De Schaamlippen (afleddt vun’t Latiensch Labia pudendi: labium „Lipp“ un pudendum „Schaam“) sünd Deel vun de buteren Geslechtsdelen bi de Fro, de all tosamen as Puus tohopenfaat warrt.

Puus vun’n utwassen Fro: De Groten Schaamlippen (1) leegt buten un verdeckt grotendeels de Lütten Schaamlippen (2). Ünner de Vörhuut (3) is de Klitoris (4) versteken. (5) is de Vagina

Bi Minschen un annere Primaten warrt ünnerscheedt twüschen de Labia maiora pudendi (Grote Schaamlippen) un de Labia minora pudendi (Lütte Schaamlippen). Bi annere Söögdeerten gifft dat blots een Poor Schaamlippen, de denn as Labia pudendi oder Labia vulvae betekent warrt un as de Lütten Schaamlippen sünd.

Grote Schaamlippen ännern

De Groten Schaamlippen (lat.: Labia maiora pudendi) verloopt vun’n Venusbult (Mons pubis) bit na’n Damm. Normalerwies sünd de slaten un verdeckt denn de Klitoris as ok de Apens vun de Miegröhr un de Scheed un schuult jem dordör. De groten Schaamlippen bargt Polster vun Fettgeweev un bedeckt vun pigmenteert Fellerhuut. Bi de utwassen Fro sünd se – in’n natürlichen Tostand – deelwies vun Schaamhoor bewassen. Dat Poor vun de Groten Schaamlippen billt den so nöömten Schaamspleet (Rima pudendi). De vördere Kommissur warrt as Commissura labiorum anterior betekent, de achtere is de Commissura labiorum posterior[1].

Bi de Nich-Primaten, de keen grote Schamlippen hebbt, warrt de böveren un ünneren Schaamwinkels (Commissura labiorum dorsalis un ventralis) un de Schaamspleet vun de Labia pudendi (oder Labia vulvae) billt, de bi de Minschen de Lütten Schaamlippen sünd[2].

Lütte Schaamlippen ännern

De Lütten Schaamlippen (Labia minora pudendi) billt de sietlich Grenzen vun’n Schedenvörhoff un draapt an de Klitoris tohopen. Se betsaht ut dünne, fettfree Huutfalten, de an de Butensiet bannig pigmenteert sünd un ut mehrschichtig Plattenepithel bestaht. De Binnensieten sünd blots wenig pigmenteert, nich verhoornt un bargt Talligdrüsen. De Lütten Schaamlippen loopt vörn alk in twee Falten uteneen, wobi de vördere Falt sik mit de Gegensiet to de Klitorisvörhuut (Präputium clitoridis) verenigt. De achteren Falten ennt elk as Klitoristögel (Frenulum clitoridis) direkt an de Klitoris.

Bi de meisten Söögdeerten is de Vörhuut vun de Klitoris mit ehr Ekel (Glans clitoridis) verwassen, man bi Hunnen un Peerd sitt de um en lütt Kuhl (Fossa clitoridis) rüm, wo de Ekel vun de Klitoris binnen freeliggt[2].

Kennteken ännern

Utsehn un Grött vun de beiden Schaamlippen-Poren künnt vun Fro to Fro bannig ünnerscheedlich utfallen. En normal Utsehn oder en Afwieken vun dat normal Utsehn kann dorüm nich defineert warrn.

De Lütten Schamlippen reageert fienföhlig op Anröhren un füllt sik mit Blood, wenn de Fro sexuell in Forht is. Se warrt denn düsterer un swellt an. Bi enige Fronslüüd warrt dordör de Ingang na de Vagina freeleegt oder de Schaamspleet ’n beten apen maakt.

Bi jüst neeboren Deerns gellt dat Bedecken vun de Lütten Schaamlippen dör de Groten as en so nöömt Riepteken, dat spezifisch is för de Entwickeln.

Verännern un Ingriepen ännern

Dat Schaamhoorwegmaken is in vele Kulturkreisen begäng un höört siet enige Johren ok in’n westlichen Kulturkreis to’t normale Vörgahn, sünners ünner de jüngeren Fronslüüd. Nich ganz so faken sünd Schaamlippenpiercings, man ok de sünd tonehmen in’t Kamen. In verscheden Sellschoppen is de Ansicht doröver, woans de Schaamlippen – sünners de Lütten – utsehn mööt, üm as schöön ansehn to warrn, düchtig ünnerscheedlich. Bi to grote binnere Schaamlippen laat enige Fronslüüd sik de Lütten Schaamlippen ok dör en Operatschoon lütter maken. Dat passeert tomeist ut rein ästhetsch Grünnen. Blots in roor Fäll is dat ut medizinsch Sicht nödig.

Bi enige afrikaansch Stämm, sünners bi de Khoi Khoi in Namibia, gellt bannig dull utpräägte, vun buten düttlich to sehen Lütte Schaamlippen as schöön. Dat föhr dorto, dat de Fronslüüd ut dissen Stamm, deels dör natürlich Utwahl aver ok dör Ingriepen vun buten (Dehnen vun de Schaamlippen) teemlich grote Lütte Schaamlippen entwickelt hebbt.[3]. Disse Tostand weer fröher vun düütsche Missionaren faken afschätzig as „Hottentottenschört“ betekent. Hottentotten weer en afschätzig Beteken för de Khoi. De Begreep schall to’n eersten mol bruukt worrn wesen vun den franzööschen Pathologen Jean Cruveilhier (1791-1874). Op dat künstlich Manipuleeren vun de Schaamlippen hett al Alexander Merensky henwiest. Er segg, dat dormit al kort na de Geboort vun en Deern anfungen weer[4].

In vele afrikaansch Länner, sünners in de Rebeden, de dör den Islam präägt sünd, warrt bi Fronslüüd en Besnieden vun de Geslechtsdelen dörföhrt. De buteren Geslechtsdelen warrt vun Rebeet to Rebeet ünnerscheedlich dull besneden; Dorbi künnt ok de Schaamlippen deelwie oder kumplett wegmaakt warrn. In roor Fäll warrt dorophen de Schaamspleet slaten, dormit keeneen in de Vagina indringen kann. En medizinschen Grund gifft dat dorför nich, de Oorsaak för dit Ingriepen is tomeist rituell. Tomeist warrt dit Vörgahn mit religiös Vörgaven begrünnt, man verwörtelt is dat al in vörislaamsch Tiet. Faken is dat Besnieden bi de Fronslüüd mit Problemen in’n Naklapp vun’n Ingreep verbunnen. Dat liggt an’t hoge Infekschoonsrisiko ünner de faken teemlich unreinen Bedingen, bi de dat dörföhrt warrt. Dat kann mitünner bit to’n Dood föhren.

kiek ok ännern

Borns ännern

  1. G. H. Schuhmacher, G. Aumüller: Topographische Anatomie des Menschen. Urban & Fischer 2004, ISBN 3-437-41366-X
  2. a b Uwe Gille: Harn- und Geschlechtssystem, Apparatus urogenitalis. In: Salomon/Geyer/Gille (Hrsg.): Anatomie für die Tiermedizin. Stuttgart: Enke-Verlag, 2004. ISBN 3-8304-1007-7.
  3. Baker, John R. (1974), Oxford University Press
  4. Hermann Heinrich Ploß, Max Bartels: Das Weib in Natur- und Völkerkunde – Anthropologische Studien, Berlin 1885

Weblenken ännern

  Schaamlippen. Mehr Biller, Videos oder Audiodateien to’t Thema gifft dat bi Wikimedia Commons.