Schaperkülle

De Schaperkülle is en Tied, wo’t in’n Juni nochmaal koolt warrn kann. Dat is so de Tied von’n 4. bet to’n 20. Juni, dor kann dat dör köhle un fuchte Luft ut’n Noordwesten gau 5 bet 10 °C köller warrn. Dat passeert aver nich jedet Johr.

De Name kummt dor von, dat de Schape to de Tied al schoren sünd, un besünners de Lammer un Auen köönt dor licht bi verfreren.

De Grund för disse Singularität is, dat sik dat Land gauer opwarmt as de See. Dat Land is in’n Juni al warm, de See aver noch recht koolt. Dorüm gifft dat över Europa en Rebeet mit sieden Luftdruck, wat dör Wind ut West un Noordwest utgleken warrt, de denn köhle Luft mitbringt.

In de vergahn Tied kunn een sik dor good op verlaten, dat dat so keem. En Ünnersöken von Flohn un Hess hett de Johren 1881 bet 1947 bekeken un rutfunnen, dat dat 89 % von de Tied en Schaperkülle geven hett.