Sersch Sarkissjan

Sersch Asati Sarkissjan (armeensch Սերժ Ազատի Սարգսյան Serž Azati Sargsyan; * 30. Juni 1954 in Stepanakert, Bargkarabach) is en armeenschen Politiker. Hüdigendags is he de Staatspräsident vun Armenien.

Sarkissjan in’n portrait

Sien Weg as Politiker

Offiziell warrt seggt, dat Sarkissjan vun 1970 bit 1978 an de philoloogsche Fakultät vun de Staatliche Universität in Eriwan studeert hett. Ünnerbraken weer düsse Tiet dör sien Deenst bi'n Militär vun 1972 bit 1974. Na sien Studium hett he as Funktschonär vun de KPdSU un vun de Jugendorganisatschoon Komsomol in Stepanakert (Xankəndi) un in ganz Bargkarabach arbeit'. Sarkissjan hett mitmaakt bi den Striet üm de Unafhängigkeit vun Bergkarabach vun Aserbaidschan. Bergkarabach weer tomeist vun Armeniers bewohnt. Vun 1989 bit 1993 weer he Baas vun de so nömmten „Strietkräft to'n Süms-Verdeffendeern“ in de Republiek Bargkarabach. Bovenhen weer he vun 1990 bit 1993 Afordenten vun dat Parlament vun Armenien. In't Johr 2004 is he Präsident vun den Schachspeelverband vun Armenien wurrn.

1993 is he Minister för't Verdeffendeern in Armenien wurrn. Dat hett he bit 2007 maakt. In'n März 2007 is he Ministerpräsident vun Armenien wurrn. Dat is he bit April 2008 bleven. In'n Februar 2008 is he to'n Nafolger vun Staatspräsident Robert Kotscharjan wählt wurrn. Ofschoonst Tokiekers vun de OSZE seggt hefft, bi de Wahlen weer in'n Groten un Ganzen allens fair aflopen, hett de annere Kannedat, dat weer Lewon Ter-Petrosjan meent, dor weer bannig bi schummelt wurrn un dor möss noch mol nee wählt weern. He hett siene Anhängers to Demonstratschonen upropen. An'n 1. März 2008 is en Massendemonstratschoon mit Gewalt uplööst wurrn. An'n 9. April 2008 hett he sien Eed as Staatspräsident vun Armenien afleggt.

In'n September 2008 hett he vun sik höörn laten, as he as eersten Staatspräsidenten vun de Törkei sien Kollegen Abdullah Gül na Eriwan inlaadt hett. Grund weer dat Footballspeel twuschen Armenien un de Törkei. Sarkissjan hett mit Gül doröver snackt „wie dat gahn schall, dat de beiden Länner, de so lang in Striet un Fiendschop leevt hefft, nu bilüttjen normol mit'nanner ümgahn könnt“. Düsse Besöök warrt as en histoorsche Reis ankeken.

Privat

Sarkissjan is verheiraat’ mit Rita Aleksandri Sarkissjan (* 6. März 1962) un hett twee Kinner, dormank de Dochter Satenik (* 17. August 1986).

Weblenks

Category:Serzh Sargsyan. Mehr Biller, Videos oder Audiodateien to’t Thema gifft dat bi Wikimedia Commons.

Websteed vun de Regeerung vun Armenien (armeensch, engelsch, russ'sch)