Sheela na Gigs sünd Steenfigurn vun Froon, de jemehr Puus wiest. Disse Figurn gifft dat veel in de keltschen Rebeden in Irland un Grootbritannien. Üm un bi 140 vun disse Figurn un Reliefs sünd hüüt noch nableven, bi 100 in Irland un bi 40 in Grootbritannien. Se doot vör allen an Karken un Borgen vörkamen.

Sheela na Gig in Kilpeck

Naam ännern

De Naam Sheela na Gig kummt toeerst bi de Königlich Iersche Akademie in de Proceedings of the Royal Irish Academy 1840-44 vör, för en Relief an de Kark in Rochestown, Graafschop Tipperary. Ok de Keltoloog John O'Donovan bruukt den Utdruck 1840 för ene Figur in desülve Graafschop. De Utdruck kummt temlich seker ut de iersche Spraak, aver wat dat nu jüst bedüden deit, dat is nich gewiss. Twee Ansätz sünd Sighle na gCíoch („Ole Hex mit Titten“) oder Síle-ina-Giob („Sheila [Froonsnaam] op ehrn Achtersten“).

Bedüden ännern

Wat de Sheela na Gigs to bedüden hebbt, dor sünd sik de Facklüüd nich eens. James Jerman, Anthony Weir un Eamonn Kelly to’n Bispeel wiest dor op hen, dat de Figurn in de Rebeden mehr vörkaamt, wo de Anglo-Normannen al fröh Foot faat hebbt, un dor weniger, wo de Kelten de Böverhand behollen hebbt. Se meent, de Figurn sünd dorvun nich original keltsch, man stammt ut Frankriek oder Spanien un sünd mit de Normannen in dat 12. Johrhunnert na de brietschen Eilannen kamen. Se sünd villicht mit de Waterspuckers verwandt un schöölt toglieks Dood un dat Böse afwiesen.

Na Joanne McMahon un Jack Roberts sünd de Sheela na Gigs vun en vörchristlichen Fruchtborkeitskult nableven un eerst later in de Anfangstiet vun dat Christendom in de Karken verboot worrn.