Sheila Watt-Cloutier

Sheila Watt-Cloutier (* 2. Dezember 1953 in Kuujjuaq) is ene kanaadsche Aktivistin, de sik för de Rechten vun de Inuit insetten deit.

Sheila Watt-Cloutier

Watt-Cloutier is 1953 as Dochter vun ene Heilerin in Kuujjuaq in Nunavik boren. De eersten teihn Johr vun ehr Leven hett se in de traditschonelle Levenswies vun de Inuit tobröcht. Denn schull se op School in Neeschottland un in Churchill gahn. Se hett later op de McGill-Universität in Montreal lehrt. In de Johren 1970 hett se för dat Ungava-Krankenhuus arbeidt, as Översetterin för Inuktitut. Vun 1991 af an bet 1995 weer se as Beraderin bi dat Evbalueren vun dat Schoolsystem vun Noord-Quebec dorbi. Dorvun hett se denn 1992 ok en wichtigen Report över dat Schoolsystem in Nunavik schreven, Silaturnimut - The Pathway to Wisdom.

Watt-Cloutier weer vun 1995 bet 1998 bi de Makivik Corporation, wat de kanaadsche Gesellschop för de Landanspröök vun de Inuit is.

1995 un 1998 en tweet Maal is se as de Kanada-Präsidentin vun de Zirkumpolar-Kumferenz vun de Inuit wählt worrn. Besünners hett se sik as Sprekerin vun de Polarvölker för de Stockholm-Konventschoon insett, de swoor afbobore orgaansche Schaadstoffen verbeden schull, de de Polarvölker besünners swoor bedrepen deen, vun wegen, dat se sik in de arktische Nahrungskeed anriekern doot un bi de Lüüd in de Arktis, de veel dorvun eten doot, to Krankheiten föhren köönt.

2002 bet 2006 weer se sogor de internatschonale Vörsitterin vun de Zirkumploarkumferenz. Watt-Cloutier deit sik nu besünners mit den Klimawannel befaten, de de Levenswies un Kultur vun de Polarvölker besünners gefährden deit. 2005 hett se ene Petitschoon bi de Interamerikaansche Kummission för Minschenrechten afgeven, dat de USA mit de Drievhuusgasen, de se produzeren doot, de Minschenrechten vun de Polarvölker na de Amerikaansche Deklaratschoon vun de Rechten un Plichten vun de Minschheit vun 1948 besehren deen.

2015 kreeg se den Alternativen Nobelpries.