Sitting Bull (engl. sitzender Bulle – eegentlich Naam Tatanka Iyotanka; * üm 1831 an’ Grand River, South Dakota; † 15. Dezember 1890 in sien Lager an’ Grand River in de Standing-Rock-Reservation, North Dakota). Sitting Bull weer Hööftling un Medizinmann vun de Hunkpapa-Lakota-Sioux. He weer en vun der groote Leeders in de Freeheitsbewegung vun de Indianer (1866-1876) tegen de amerikaansch Siedlers un Truppen.

Sitting Bull
Sitting Bull un Buffalo Bill

He weer en vun de geistig Föhrers in de Slacht an’ Little Bighorn van 1876, in de Crazy Horse un Big Foot dat 7. Kavallerieregiment vun General George Armstrong Custer kört un kleen haun hebbt. Dat weer de gröttste Verlust vun de US-Armee tegen de Indianer, de dat in de Historie gifft. Sitting Bull weer bi de Kamp gar nich dorbi, wiels he vun en Sünnendans noch wat schlapp weer.

Liekers kreeg he bannig Arger. De US-Armee hett to’n Straaf en Expeditschoon tegen hüm un sein Lüüd dörföhrt. Mit 2000 bit 3000 Lüüd hett he sik aber gau in Sekerheit nah Kanada brocht un is dor in’t Exil bleben. An 19. Juli 1881 hett he sück aber in in Fort Randall stellt, wiels hüm de Witten de Bisonherden vernicht harr nun he un sein Lüüd folglich nichts mehr to Jagen un to Eeten harrn. Dornah leev he in de Standing-Rock-Reservatschoon.

1885 wurr he in de Wild West Show vun Buffalo Bill in de USA un in Kanada vörföhrt. Wiels he kien Englisch snacken kunn und wiels se hüm wat vörspeegelt harrn, hett he denn ok nich mitkregen, dat dat blots en Show weer. He hett glövt, dat he up disse Weg (sein Reeden hett he in Lakota hollen) hoopt, över de Verbreken van de Witten tegen de Indianers snacken to können un en Ümdenken henn tokriegen. Irgendwann hett he dat aber denn doch spitz kregen. An de Europa-Tournee vun Buffalo Bill 1887 hett he denn nich mehr deelnommen.

Aber de amerikaansch Behörden hullen Sitting Bull wieder henn för en Unrohstifter, wiel he dat Verlüttern vun de Reservatschonen kritiseeren de. Ok dat nich de Levensmiddel un anner Materialien, so as anköndigt, kommen deen, hett he anmarkt. Anpassen wull he sück ok nich, he weer Indianer und bleev dat.

Also hett man hüm immer un överall as Feindbild dorstellt, ok in de Zeitungen. Deelen vun de Apenlichkeet un insbesünnere dat Militär hebbt immer seggt, dat de Slacht an Little Bighorn en groot Unrecht weer und Sitting Bull Schuld harr. Sien dormolig Verhollen weer dornah arglistig un hinterhältig, glieker Taten bi de US-Armee wurrn dorgegen as överleegen Taktik dorstellt.

Sitting Bull wull weer de Geisterdans-Bewegen bi sien Anhängers tolaaten. Aber de Reservatschoons-Polizei (dat weern fruendlich Indianer) und de US-Armee weern dorgegen un hebbt hüm fastnommen. As sien Anhängers Wedderstand leisten deen, hett de Polizei Sitting Bull an 15. Dezember 1890 doodschaten un sein Liek verstümmelt. Twee Weken later geev’t denn dat Massaker bi Wounded Knee.


Webllenken ännern

  Op Wikiquote gifft dat Zitaten to, över oder vun „Sitting Bull“ (hoochdüütsch).