Sjoukje Dijkstra
Sjoukje Rosalinde Dijkstra (Utspraak: [[ˈʃʌukjə ˈdɛikstra]], * 28. Januar 1942 in Akkrum, Friesland; † 2. Mai 2024 in Someren, Noord-Brabant) weer en nedderlannsch Ieskunstlöperin, de in’t Eenzel antreeden dee. Se weer Olympiasiegerin 1964, Weltmeesterin 1962 bit 1964 un Europameesterin 1960 bit 1964.
Werdegang
ännernSjoukje Dijkstra weer de Dochter vun den Iesflinklöper Luitzen „Lou“ Dijkstra (1909–1964), de an de Olympisch Spelen 1936 in Garmisch-Partenkirchen deelnommen harr. In dat Öller vun söss Johren fung se mit dat Ieskunstlopen an un gau wurr hör Talent sehn. Mit 12 Johren, 1954, nehm se all an Europameesterschapen deel. In London is se denn vun Arnold Gerschwiler, den Unkel vun den Ieskunstloopweltmeester Hans Gerschwiler traineert wurrn. Se un hör wat öllere Landsfru, Joan Haanappel, kunnen sück immer mehr verbetern. Nahdem se veermal Tweet bi natschonalen Meesterschapen wurrn weer, wunn se 1959 hör eersten natschonalen Titel vör hör Konkurrentin. Dat weer ok glieks de eerste vun söss natschonalen Meestertiteln in Reeg.
In dat sülvig Johr wunn se ok hör eerst internatschonalen Medaillen. Bi de Europameesterschap in Davos wurr se Viez-Europameesterin achter Hanna Walter ut Öösterriek un bi de Weltmeesterschap in Colorado Springs reck se de Bronzemedaille achter Carol Heiss un Walter. En Johr later, in dat olympisch Johr 1960, wunn Dijkstra hör eersten grooten internatschonalen Titel. Bi de Europameesterschap in Garmisch-Partenkirchen wurr se Europameesterin vör Regine Heitzer ut Öösterriek un hör nedderlannsch Landsfru Haanappel. Dat weer de eerste Europameesterschapstitel in’n Ieskunstloop för de Nedderlannen. Bi de Weltmeesterschap in Vancouver wurr Dijkstra Viez-Weltmeesterin achter Carol Heiss un vör Barbara Roles. Dat sülvige Ergevnis reck se bi de Olympisch Spelen in Squaw Valley, as se de Sülvermedaille weer achter Carol Heiss un vör Barbara Roles wunn. Dat weer all hör tweet Deelnahm an Olympisch Spelen, 1956 weer se up den 12. Platz kommen. Carol Heiss is nah hör Olympiasieg 1960 un hör letzt Weltmeestertitel torüchtreden un de Weg weer free för Dijkstra, de nu de Weltkonkurrenz domineeren dee un all Wettbewarfen winnen de, bi de se antreeden is. 1961 hett se hör Europameesterschapstitel in Berlin vör Regine Heitzer un Jana Mrázková verteidigt. In dit Johr wurr de Weltmeesterschap wegen den Floogtüüchafstört vun de US-Mannschap afseggt. Dat hett hör wohrschienlich en Weltmeestertitel köst.
1962 wunn Dijkstra to’n darten Mal in Reeg de EM-Titel, vör Regine Heitzer, Karin Frohner un Helli Sengstschmid (all ut Öösterriek), wobi Heitzer noch mehrmals hör Hööftkonkurrentin ween sull. In dat sülvig Johr reck se ok noch in Prag hör eersten WM-Titel vör de Kanadierin Wendy Griner, Regine Heitzer un Petra Burka. Dat weer de eerste Goldmedaille för de Nedderlannen bi en Ieskunstloop-Weltmeesterschap. 1963 kunn se beid Titel verteidigen. Bi de Europameesterschap in Budapest wunn se vör de Französin Nicole Hassler un Regine Heitzer un bi de Weltmeisterschaft in Cortina d’Ampezzo vör Regine Heitzer un Nicole Hassler.
Dat Johr 1964 weer de triumphale Afsluss vun hör Karriere. Eerst wunn se in Grenoble vör Heitzerun Hassler hör fieften EM-Titel, denn folg in Dortmund hör dart WM-Titel in Reeg (vör Heitzer un Burka). Sluutend wurr Dijkstra bi hör dart olympisch Spelen in Innsbruck ünner de Oogen vun de nedderlannsch Königsfamilie Olympiasiegerin vör Heitzer un Burka. Hör Sieg weer ok gliekbedüüdend mit dat eerste Gold för de Nedderlannen bi Winterspelen.
Hör gröttste Stärke weern hör Plichtfiguren, aber se weer ok en athletische un starke Kürlöperin, de düppelte Axelsprünge un insprungen Pirouetten in hooch Qualität wiesen kunn un deren Bewegungen flüssig un mit wenig Upwand dorherkeemen.
Nah hör Olympiasieg 1964 hett se sück vun den Amateursport verafscheed un wessel to de Profis un tour dor bit 1972 mit Holiday On Ice. Se hett den Zirkusdompteur Karl Kossmayer heiraadt, mit den se twee Döchter, Rosalie un Katja, harr. Beid Döchter hemm dat ok mit Ieskunstloopen versöcht, hemm denn aber en Karriere in’n Zirkus vörtrucken. 1985 wurr Dijkstra Beraderin bi den nedderlannschen Iesloopverband. Tietwies hett se ok för dat nedderlannsch Feernnsehn kommenteert.
Sjoukje Dijkstra is in’n Mai 2024 in dat Öller vun 82 Johren storven.
