Slice (Ballsport)

De Slice (in’t engelsche ok Backspin) is en Slagtechnik för Vörhand un Rüchhand, de in’t Tennis as ok in’t Dischtennis begäng is.

Prinzip vun’t Ünnersnieden bi’n Slice

Slagtechnik

Bi’n Slice warrt de Ball mit den Släger in en Bewegen na ünnen vun achtern-baven na vörn-ünnen striept (ünnersneden). An de Ballünnersiet ströömt de Luft vergleken to de Ballböversiet langsomer vörbi – de Luftpartikels, de vun’n Ball mitreten warrt bewegt sik gegen de Flaagricht, so dat de Luft afbremst warrt – un veroorsaakt dör’t Küseln en Överdruck un dormit en Opdrief (Magnus-Effekt). De Folg dorvun, dat de Flaagbahn flacher warrt un sik mehr hentreckt gegenöver en Ball ahn Rotatschoon. Bi’t Tennis warrt de Ball mööglichst an’n hööchsten Punkt nahmen. Faken kann de blots mit en teemlich lütte Snelligkeit speelt warrn, vun wegen dat he sonst över de Grundlien rutneiht. Wenn de Ball opdrapen deit, springt he wegen de streckten Flaagbahn un wegen’t Afbremsen dör sien Rotatschoon flach af, man ünner en grötteren Winkel as bi’n Ball ahn Slice.

In’t Dischtennis warrt de Slice (de dor ok Ünnersnittball heet) in’n Gegensatz to’t Tennis vun de Defensiv-Spelers faken wiet achter’n Disch un wiet ünner’t Niveau vun’n Disch speelt.

Taktisch Anwennen

Bi’t Tennis warrt disse Slagtechnik mol as Angreepsball, mol as Stopp un mol as Defensivball insett. Faken gifft de Speler den Ball tosätzlich noch en Sietwärtsdrall (Sidespin), so dat de Ball na’t Opdrapen na de Siet wegspringt. Bi’t Angriepen hett disse Technik den Sinn, den Ball nipp un nau to platzeeren. De Speler hett dör den verlängerten Flaag mehr Tiet dichter an’t Nett vörtogahn. Ok in de Afwehr hett de Slice den Sinn, Tiet to winnen, wenn en Speler to’n Bispeel ut de Mitt vun’t Feld rutdrängt worrn is un sik nu wedder en betere Positschoon to söken. Warrt de Slice as Stoppball slahn, is dat flache Afspringen vun’n Ball för den Gegenspeler sünners asig, vun wegen dat he den Ball denn, wenn he al dicht an’t Nett steiht, egentlich blots noch över’t Nett böhren kann. Speler, de op’n hooch Niveau speelt, künnt den Ball bi’n Stopp mit en sünners starken Torüchoorsdrall versehen, so dat de Ball mitünner sogor gegen de Bewegensricht torüchspringt..