Sophie Dethleffs

Sophie Auguste Dethleffs (ok: Dethlefs) (* 10. Februar 1809 in Heid; † 13. März 1864 in Hamborg) weer en plattdüütsch Dichterin.

Leven

Se weer dat jüngste Kind vun de Bankdirektor un königlich Beamten Dethleffs. Hör Moder is glieks nah hör Geburt storben, hör Vader starv 1838. Dornah is se vun Justizrat Paulsen annommen wurrn, in de sien Huus se sowat as en Sellschoperin weer. To Kindööp, Pulterabenden, sülvern Hochtieten un ähnlich Veranstaltungen schreev se Gedichte. Ok Theaterstücke hett se schreben. Hör Gedicht „De Fahrt na de Isenbahn“ weer all en lang Tiet bekannt, bevör dat 1850 in sleswig-holsteenschen Volksklenner druckt wurrn is. Dat Gedicht fangt so an:

De Fahrt na de Isenbahn

Hans har sin Fru dat all lang verspraken,

Se wullen tohopen mal'n Lusttour maken,

Wenn dat Wedder ins moje weer

Un nicks to don för den Wagen un Peer.

Denn wo ehr Fründschap, wo Clas-Ohm wahn,

Da gung jüs vöröber de Isenbahn.

Da weer all lang so veel Snackens um ween,

Nu wull'n se doch sülvst den Specktakel mal sehn.

Paulsen is denn 1848 storben un Sophie Dethleffs wurr mehr un mehr eensam, 1853 is se in de Schröderstift för „Hilfebedürftige aus besseren Ständen“ in Hamborg upnommen wurrn, wo se denn ok stürben is.

Warken

• Gedichte. Heide: Pauly 1850 (Neu herausgegeben von Michael Töteberg. Boyens, Heid 1989. ISBN 3-8042-0460-0)
• De Fahrt na de Isenbahn, Artur Fürst zu Ehren, Erasmusdruck, Berlin 1850 (1921 Needruck)
• Gedichte in hochdeutscher und plattdeutscher Mundart. 2 Bände. Kittler, Leipzig 1861

Literatur

• Sophie Dethleffs ut' e Heid un annere voer Klaus Groth, H. Lühr & Dircks, Garn 1926

Kiek ook bi

• List vun plattdüütschen Schrieverschen

Weblenken

• Sophie Dethleffs in de Datenbank Die niederdeutsche Literatur (hoogdüütsch)
• Ulrich Goerdten: "Die Bibliothek des Plattdütsch Vereen Quickborn zu Berlin in der Universitätsbibliothek der Freien Universität Berlin" (hoochdüütsch)