Spermizid
Spermiziden sünd Stoffen, de Spermien dood maakt un dormit en Befruchten hinnert. Spermiziden warrt also bi’n Sex as Middel to’n Verhöden anwennt.
De meisten Spermiziden bargt de cheemsche Verbinnen Nonoxynol-9 as medizinsch wirksomen Bestanddeel, de in de letzten Johren diskuteert worrn is. Produkten to’n Verhöden warrt ok op de Grundlaag vun Melk- un Zitronensüür anboden. Solke Produkten sünd na de Definitschoon an sik keen Spermiziden, vun wegen dat in en suur Miliö blots lahm aver nich dood maakt warrt. Dör de glieken Afsicht bi de Anwennen un de glieke Produktform as’n Gel warrt se faken dormit verwesselt. De Spermien künnt nich mehr aktiv swemmen un ok bi den Modermund mit sien basisch Ümfeld nich mehr passiv ankamen. Bi en vergliekbore Wirkwies hebbt Produkten, de free sünd vun Nonoxynol-9, den Vördeel dat se bi’n Oralsex nich bitter smeckt.
Spermiziden gifft dat in ünnerscheedliche Formen. Se sünd to’n Bispeel in vele Schedentappen binnen un warrt as Spermizid-Gel anboden. Eenige Herstellers vun Kondomen geevt bi jemehr Produkten en spemizid Gleedmiddel bi. Spermiziden hebbt en Pearl-Index vun 3 bit 21.[1]
Gels un Cremes to’n Verhöden schüllt jümmer tohopen mit en Sparrmethood (to’n Bispeel en Kondom oder en Diaphragma) bruukt warrn, üm de Sekerheit grötter to maken.[2] Cremes un Tappen mit Spermiziden, de nich op Grundlaag vun Water maakt worrn sünd, drööf aver nich tosamen mit Kondomen bruukt warrn, vun wegen dat de dat Gummi angripen dood un poröös maakt.[3]
Borns ännern
- ↑ Leitlinien der Deutschen Gesellschaft für Gynäkologie und Geburtshilfe (DGGG), 2004, bi AWMF online
- ↑ Pro Familia: "Verhütungsgels" [1]
- ↑ Infobroschüre "Mach's mit" vun de Bundszentral för gesundheitliche Opklären
Weblenken ännern
- Verhöden, cheemsche Methoden bi Schwanger-info.de vun de Bundeszentrale för gesundheitliche Opklären (BZgA)
- Cheemsch Verhöden vun Pro Familia (Düütschland)