Spint

De Spint, Zylinner oder Hoge Hoot is en zylinnerförmigen Hoot mit Kremp, de vör allen in’t 19. un’t fröhe 20. Johrhunnert in Mood weer.

Spint (dragen vun Austin Lane Crothers)

De Spint keem toeerst üm 1800 op, dat mehr Lüüd em dregen weer aver eerst üm 1820. He weer de Hoot vun de Börgers, de sik dor mit gegen Adel un de eenfachen Lüüd afsetten. He bleev Symbol för de wat betern Lüüd, weer aver ok Deel vun de Dracht vun Sottjes, Kutschers oder vun Böhnen-Töverers. Mit de 1920er un 1930er Johren keem de Hoot ut de Mood. Toletzt dregen noch Diplomaten den Spint, aver ok dat weer denn bald vörbi.

Welk vun disse Hööt hebbt ’n Drahtstell inboot un köönt so tohoopklappt warrn. Wenn denn de Hoot anstött warrt, denn klappt he mit’n Snapp wedder ut. Disse Hoot heet denn Schapoklapp un is meist vun Sied maakt.