Stellsfellen
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 28870 | |
| Vörwahl: | 04297 | |
| Geograafsche Laag: | Koordinaten:53° 2′ N, 9° 11′ O53° 2′ N, 9° 11′ O | |
|
| ||
Stellsfellen (hoochdüütsch Stellenfelde) is en Dörp in de Gemeen Otterbarg in’n Landkreis Veern, Neddersassen. Binnen de Gemeen Otterbarg höört de Oort to de polietsche Oortschop Posthusen.
Geografie ännern
De Oort liggt in dat Hellweger Moor. Dat Water ut dat Rebeed warrt över Gravens na de Wümm hen afföhrt.
De Naveröörd sünd Wümmingen un Postdörp in’n Noorden, Stell un Hellweeg in’n Noordoosten, Bokel un Bredenfellermoor in’n Oosten, Allerdörp in’n Süüdoosten, Langwedelermoor in’n Süden, Grasdörp, Hintzendörp, Giersdörp un Schanzendörp in’n Westen un Middeldörp un Rootlook in’n Noordwesten.
Historie ännern
Stellsfellen is 1792 as Moorkolonie in dat Hellweger Moor grünnt worrn. Dat Dörp leeg op de Oostsied von de Straat, de vondaag de Landsstraat 155 billt. Op de Westsied von de Straat is een Johr later de Kolonie Hintzendörp grünnt worrn. De Naam von de Kolonie kummt af von’n Hoff Stell in’n Noordoosten.
In’n Eersten Weltkrieg sünd 21 Soldaten ut Hintzendörp un Stellsfellen fullen oder vermisst un in’n Tweten Weltkrieg 33.[1]
Verwaltungsgeschicht ännern
In de Franzosentied von 1810 bet 1814 hett de Oort to de Mairie Karkwals in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1852 to de Amtsvaagdie Ahusen (Ünnervaagdie Hintzendörp) in dat Amt Rodenborg tohöört un denn von 1852 bet 1885 to dat Amt Achem. Na 1885 weer dat in’n Kreis Achem. 1932 is dat Deel von’n Kreis Veern worrn.
De Oort hett tohoop mit Hintzendörp de Buurschop un later de Gemeen Hintzendörp-Stellsfellen billt, bet sik Allerdörp un Hintzendörp-Stellsfellen an’n 1. September 1960 to de Gemeen Hintzendörp tohoopslaten hebbt. Düsse Gemeen hett sik an’n 1. Juli 1968 denn wedder mit dree annere Gemenen to de Gemeen Posthusen tohoopslaten. Mit de Gemeenreform in Neddersassen an’n 1. Juli 1972 is de Gemeen Posthusen Deel von de Gemeen Otterbarg worrn. Sietdem billt Posthusen binnen de Gemeen Otterbarg en Oortschop.
Inwahnertall ännern
| Johr | Inwahners |
|---|---|
| 1812[2] | 121 |
| 1824[3] | 18 Füürsteden |
| 1848[4] | 127 Lüüd, 20 Hüüs |
| 1. Dezember 1871[5] | 160 Lüüd, 23 Hüüs |
| 1. Dezember 1885[6] | 134 Lüüd, 22 Hüüs |
| 1. Dezember 1905[7] | 161 Lüüd, 25 Hüüs |
Religion ännern
Stellsfellen is evangeelsch-luthersch präägt un höört to dat Kaspel von de Lukas-Kark in Postdörp. Düsse Kark is 1852 nee boot worrn. Vörher hett de Oort to dat Kaspel von de Marien-Kark in Ahusen tohöört.
De Oort hett aver mit de Matthäus-Kark ok en egen Kark. Disse Kark höört to de Sülvstännige Evangeelsch-luthersche Kark. De Kark is 1955 wieht worrn, nadem de Karkengemeen vörher in Postdörp Goddsdeenst fiert hett. De Karkengemeen geiht trügg op düütsche Verdrevene, de 1945 ut Polen kemen.
För de Kathoolschen is de St.-Matthias-Kark in Achem tostännig.
Kultur ännern
En Denkmaal för de Fullenen ut de twee Weltkrieg’ steiht in Postdörp bi de Kark.
Weertschop un Infrastruktur ännern
För Stellsfellen is de freewillige Füürwehr Posthusen mit tostännig.
Verkehr ännern
Dör Stellsfellen löppt de Landsstraat 155, de in’n Noordwesten över Postdörp un Wümmingen na Otterbarg an de L 168 ran geiht un in’n Süüdoosten över Allerdörp na Völkersen un Nindörp an de L 158. Von de L 155 geiht na Süüdwesten de Kreisstraat 7 af över Grasdörp un Steenbarg na Ädelsen an de L 158.
De nächste Autobahn is de Autobahn 1 (Afsnidd Hamborg–Bremen). De Opfohrt 51 Posthusen liggt so bi fiev Kilometer in’n Noordwesten von Stellsfellen an de L 155. De Opfohrt 24b Langwedel op de Autobahn 27 liggt so bi söss Kilometer in’n Süden an de K 9.
De nächste Bahnhoff is so bi söven Kilometer wied weg in’n Noordwesten de Bahnhoff Otterbarg an de Bahnlien Hamborg–Bremen. De Bahnhoff Langwedel an de Bahnlienen Wunsdörp–Bremen un Ülzen–Langwedel liggt üm un bi teihn Kilometer in’n Süden. Disse Bahnhoff is ok inbunnen in dat Nett von de Regio-S-Bahn Bremen/Neddersassen.
Scholen ännern
De Kinner ut Stellsfellen gaht na de Grundschool Posthusen. Na de 4. Klass wesselt se in de Regel op de Oberschool Wümmschool in Otterbarg oder op dat Gymnasium Otterbarg.
Footnoten ännern
- ↑ Onlineprojekt Gefallenendenkmäler
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 98
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 578
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 154
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 177
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 3