Stemmiesen

Stemmiesen (n., pl. Stemmiesens) is een Warktüüg ton arbeeden in Holt. Welkeen seggt ok Steekiesen oder Betel dorto. Stemmiesen un Steekiesen hebbt in grunnen de liekse Form, Stemmiesen ward se vun de Timmerlüüd nömt un se sünd wat gröffer, Steekiesen ward se vun de Dischers nömt un de sünd wat fiener.

An'n Stemmiesen kann'n utenanner holen: Dat Iesen / de Kling un den Greep / dat Heff. Dat Iesen het an ünnern Enn de Snied un an'n böberst Enn de spitze Angel mit de et in'n Greep fastsitt. Düt Iesen is utsmeet un dormit es et Stahl. De Greep wer vun fröher her un hüt ok noch veelfach ut Holt. Ünn, dor wo de Angel in sitt is een Twing ut Iesen, de dat Holt vör Opklöben schütten deit. Boben üm den Greep rüm is ok een Iesenring, den nömt'n Schlagring, he verhinnert, dat dat Heft bi det Arbeeden mit'n Kloppholt kaputt geiht. Modern Stemmiesen hebbt veelfach een Greepen ut Plastik.

Stemmiesen gifft dat in veel ünnerscheedlik Form un Grööt, de in Düütschland t.B. in'ne DIN 5139 fastleggt is.