Stockhusen

Stockhusen (hoochdüütsch Stockhausen) is en Dörp, dat hüüt vun de Verwaltung her to de Stadt Lübbecke in Noordrhien-Westfalen höört. Stockhusen hett 795 Inwahners. Bet 1973 höör de Buernschop Stockhusen to de Gemeend Blasem.

Dat Dörp Stockhusen vun Süden ut sehn

Dat Goot un Waterslott Stockhusen

Stockhusen is en vun Bueree präägt Dörp mit egene Kark. De Oort is üm un bi een Kilometer vun de Stadt Lübbecke weg. Rund üm dat Dörp liggt Feller un Wischen un na Süüdoost en lütt Holt, de Stockhuser Busch, de hüüt in Besitt vun de Familie vun de Recke is.

Historie

Johann von Uflen un siene Fro Gese sünd de eersten Lüüd, de en Hoff in Stockhusen, Kaspeel Blasem, beseten un mit Naam bekannt sünd. An’n 9. August 1355 hebbt se ehren Hoff to „Stockusen“ in Pand geven.

Goot

De „Borg Stockhusen“, de ünner Denkmalschutz steiht, maakt den Utgangspunkt vun de Buerschop ut. Hüüt liggt de Borg aver westen vun’t Dörp. De eerste Tiet vun Borg un Goot liggt in’t Düüster. Siet 1411 seet de Familie vun Westrup, en Riddergeslecht, op Borg Stockhusen. An’n 3. September 1620 hebbt Anna Margaretha vun Westrup, de Arvin vun Stockhusen, un Dietrich vun de Recke ut dat Huus Steenfurt en Ehverdrag afslaten. Dor stünn in, dat Dietrich 13.000 Rieksdaler ut dat Arv vun sien Vader in de Eh mitbringen schull un Anna dat Goot Stockhusen un de Hööv in Lübbecke. Dormit güngen Borg un Goot Stockhusen in’n Besitt vun de Familie vun de Recke över. In’t Johr 1979 hett Prof. Dr. Hans-Werner Schürmann de Borg tohopen mit de Graft köfft un hett de rünnerkamenen Gebööd restaureren laten.

Dat Doorhuus stammt ut dat Johr 1672, dat Haupthuus ut dat Johr 1699