Stork

De Stork oder Aadboor, ok E(e)beer, is en groten Vagel mit enen langen lieken Snavel, hoge Benen un enen korten Steert. De witte Stork hett swarte Flunken; Been un Snavel sünd root. Bi't Flegen warrt de Hals wiet vörutstreckt. De mehrsten Störk sünd in Gegenden mit sumpige Wischen un Seen antodrapen, aver ok dar sünd se in de lesden Tieden tämlich roor wurrn. Nisten deit de Stork up Hüüs un Schünen, mennigmaal ok up Bööm. Sien Nest boot he ut Ries un Sprickwarks, leggt veer oder fief witte Eier, ut de de grieswitten Jungen utslüppt. Se warrt in'n Juli flügg un treckt in'n August mit de Olen na Afrika. De westdüütschen Störk fleegt över Süüd-Frankriek un Spanien, de oostdüütschen un baltischen över den Bosporus na den Nil un bit na Süüdafrika.

Stork, Äbeer, E(e)beer, Aadboor
Stork
Systematik
Ünnerstamm: Warveldeerten (Vertebrata) Klass: Vagels (Aves) Ünnerklass: Niegkeevvagels (Neognathae) Ornen: Ciconiiformes Familie: Störk
Wetenschoplich Naam
Ciconia ciconia
Linnaeus, 1758

Dree witte Störk

De witte Stork warrt na dat Klappen mit sienen Snavel ok woll Klapperstork nöömt. Fröher wurr faken dat Märken vertellt, dat de Klapperstork de lütten Kinner bringt. Vandaag glöövt aver nüms mehr an so’n Hintjentüüg.

Plattdüütsche Naams

For den Ebeer gifft dat ’n grote Masse plattdüütsche Naams:

• • Aadebar (Oostfreesland)
  • Äbäär (Finkwarder)
  • Aadboor
  • Adebeer
  • Aebär (Oostfr.)
  • Ajewaar (Oostfr.)
  • E(e)beer (Oorssen un Habenhusen)
  • Haadbaa (Oostfr.)
  • Knappendreger (Pommern)
  • Obär (Oostfr.)
  • Ohrbeer (Oostfr.)
  • Ojewaar (Oostfr.)
  • Oodbeer
  • Ooijevaar (Oostfr.)
  • Störk (Graafschop Bentheim, Oostfr.)
  • Stoork (Oostfr.)
  • Stoorke (Oostfr.)
  • Stork (Graafschop un Ollenborger Mönsterland)
  • Stürk (Oostfr.)
  • Sturk (Ollenborger Mönsterland)

Wo de Naam Eebeer herkummt

De eerste Sülve "Ee" is afslepen vun ooldsassisch "Od" (Glück, Goot) un dat "beer" kummt von "beran" (bören). Odberan, de dat Glück böört. Oder eenfacher: Glücksbringer.

Kiek ok bi

• List vun Vagels, mit allerhand plattdüütsche Vagelnaams un Naams ut de Naberspraken
• Projekt: Deerternaams up Platt

Weblenken

Wikispecies: Ciconiidae

Störk. Mehr Biller, Videos oder Audiodateien to’t Thema gifft dat bi Wikimedia Commons.

 Wiktionary: Aadboor – Bedüdensverklaren, Woortherkamen, Synonymen, Översetten