Swarte Eener
De Swarte Eener is de eerste Breefmark, de in Düütschland rutgeven worrn is, neemlich an’n 1. November 1849 in dat Königriek Bayern. De Beteken leidt sik af vun de Klöör un den Nominalweert vun een Krüüzer vun de Breefmark. De Weert weer to de Tiet de normale Pries för’t Beföddern vun een Oortsbreef. Dat Motiv is vun Johann Peter Haseney steken worrn. De Breefmark is op handschöppten Papeer druckt worrn un hett keen Tähnen.
De Swarte Eener weer de lüttste Weert vun een hele Serie vun teemlich liek utsehnde Marken. To lieken Tiet sünd ok de blaue 3-Krüüzer un de brune 6-Krüüzer-Mark rutgeven worrn, Man, an den Dag, as de Breefmark rutkeem, harrn blots grote Postämter apen, wiel dat an den Fierdag Allerhilligen weer. Opstunns is noch keen Breefmark opduukt, de nawiesbor al an’n 1. November bruukt worrn is (to sehn an’n Poststempel oder Breefdatum).
De swarte Klöör vun de Breefmark hett sik aver as nich so goot rutstellt, wiel de Stempelfarv to’n Entweerten ok swart weer. Dorüm is de swarte Eener teemlich gau dör en ne’e Utgaav uttuscht worrn, de rosaklöörte Eener, de vun’t Teken an de 3- un 6-Krüüzer-Marken angleken worrn is. In’n Oktober 1851 is de Breefmark vun Schalterverkoop torüchtogen worrn. Man bit to’n 31. August 1864 künn een dormit noch en Breef frankeeren.
De Swarte Eener is op twee verscheeden Platten druckt worrn. De eerste dorvun hett en teemlich unscharpen Druck veroorsakt. De tweete Platt 1850 hett in’n Druck veel klorer utsehn. De Oplaag weer 832.500, dorvun 472.500 mit de eersten un 360.000 mit de tweeten Platt. Disse Oplaag is teemlich hooch, man de Mark warrt vun Sammler liekers geern nahmen un söcht un hett dorüm en Sammlerweert vun 1.000 bit 3.000 Euro.
In de nafolgend Johren sünd ut de Serie wietere Weerten rutbrocht worrn: een 9-Krüüzer in gröön, de 12-Krüüzer in root un de 18-Krüüzer in orange. Vunwegen en Afkamen in’n Rohmen vun’n Düütsch-Öösterriekschen-Postvereen sünd de Klören naher noch mol verännert worrn, wiel dor binnen för lieke Weerten ok en lieke Klöör afmaakt worrn is. Siet de Tiet is de Een-Krüüzer in gele Klöör maakt worrn.
Websteed ännern
- "Der schwarze Einser" (Artikel op de Websteed vun de Düütschen Post (hoochdüütsch))