Talisker
Talisker is en Whisky-Destille op dat Eiland Skye in Schottland. De Brenneree höört to’n Spirituosenkunzern Diageo (fröher: United Distillers). De Whisky ut de Destille warrt as Deel vun de Classic-Malt-Reeg vun den Kunzern in’n Hannel anboden.
| Talisker | |
|---|---|
 Brenneree Talisker | |
| Land | Schottland |
| Region | Islands |
| Tyyp | Malt |
| Status | aktiv |
| Besitter | Diageo |
| Grünnt | 1831 |
| Grünner | Hugh & Kenneth MacAskill |
| Washstill(s) | 2 × 14.706 l |
| Spiritstill(s) | 3 × 11.024 l |
| Produkschoonsvolumen | 2.000.000 l |
Historie ännern
De Brenneree Talisker is in’t Johr 1831 vun de Bröder Hugh un Kenneth MacAskill in den Oort Carbost an’t Över vun’n Loch Harport grünnt worrn. De Naam is afleidt vun dat Goot Talisker House, de en poor Mielen wieter na Westen to in de Bargen liggt. As de Bröder doodbleven weern, hett Donald MacLennan de Destille övernahmen. He weer aver keen go’en Gewarfsmann un güng al wenige Maanden later pleite. De Brenneree weer denn vun J.R.W. Anderson wieterföhrt, de aver ok gau pleite güng un sogor wegen Bedrug insparrt worrn is, vunwegen dat he Whisky, de noch op Lager wesen hebben schall, verköfft hett, den dat in Wohrheit aver gor nich geev.
De Destille sülvst hett dorvun aver keen Schaden nahmen. De schottische Schriever Robert Louis Stevenson beteken den Whisky in en Gedicht as the king o’ drinks („den König vun de Drunken“). De nächsten Besitters weern Alexander Grigor Allan, en Finanzverwalter ut Morayshire, un Roderick Kemp, de in Aberdeen mit Wien un Spirituosen hanneln de. Se boen de Destille wedder op un hebbt mit en Kapazität vun 40.000 Gallonen in’t Johr produzeert. 1892 bleev Allan de alleenige Besitter vun de Brenneree. Na sien Dood hebbt de Verwalters denn de Talisker Distillery Co. LTD grünnt, de kort late rmit de Dailuaine-Brenneree to de Dailuaine-Talisker Distilleries LTD fusioneert sünd.
1900 is bi de Brenneree en Pier boot worrn, so dat nu Scheep bi jeden Waterstand anleggen künnen. Butendem is en Feldbahn to’n Verbinnen vun de Produkschoonssteden mit de Hüüs vun de Arbeiters inricht worrn. De Manager Thomas MacKenzie is 1916 doodbleven. Dorna hett en Konsortium, to dat ok John Walker & Sons hören de, de Mehrheit vun de Aktien övernahmen. Ut dat Konsortium is 1925 de D.C.L. (Distillers Company Ltd.) entstahn. 1928 is de Produkschoon vun dat fröhere dreemolige Brennen op dat tweemolige Brennen ümstellt worrn, as dat vundaag noch begäng is.
In’n November 1960 geev dat en Füür in de Produkschoonsanlaag, de dorbi toschannen kamen is: Een vun de Ventilen an de spirit still 1 weer vergeten worrn to to maken, vördem de Brenndörgang losgüng. Un as dormols de Brennblasen noch mit Kahl hitt maakt worrn sünd, füng dat överlopene Destillat an to brennen un sett ok dat Huus in Brand. De Brenneree is 1962 wedder jüst so as dat Original opboet worrn, üm den oorsprünglichen Smack vun den Whisky to wohren.
Bit 1972 bedreev Talisker en egene Molteree. Man siet denn köfft de Brenneree dat Molt as de meisten schottischen Brennereen vun annere Produzenten, as to’n Bispeel vun Glen Ord. Vundaag höört de Destille to de United Distillers & Vinters LTD, de siet 2002 to Diageo höört. Talisker warrt veel ok vun Touristen besöcht, de sik in dat goot utboete Besökerzentrum ümkieken un den Whisky kosten oder ok de Produkschoonsanlagen besichtigen künnt.
Produkschoon ännern
De Talisker-Brenneree höört to dat schottische Whisky-Rebeet Eilannen. In de Produkschoonssteed gifft dat fief Brennblasen: twee wash stills to 14.706 l un dree spirit stills to 11.024 l. Ansteed vun moderne Kondenser warrt jümmer noch mit Kondenseerspolen arbeit, vunwegen dat de den Smack „vuller“ maken schüllt. Vundaag warrt de Brennblasen mit Waterdamp hitt maakt, de in en Nevenhuus mit Öölfüür tüügt warrt. För de Produkschoon warrt teemlich törfig Molt mit en teemlich hogen Phenolandeel vun 25 ppm bruukt. Man, ok dat Water för de Produkschoon, dat ut veerteihn verscheden Borns stammt, löpt över Törf, wat den Smack noch intensiver maakt.
Talisker warrt veel as Single-Malt-Whisky verköfft, is aver ok Bestanddeel vun verschedene Blend-Whiskys. De bekannste dorvun is de Johnnie Walker, de ok vun Diageo sülvst herstellt warrt. Talisker-Whisky warrt aver ok för de Produkschoon vun den Whiskylikör Drambuie verwennt.
Kiek ok ännern
Weblenken ännern
Koordinaten:57° 18′ N, 6° 21′ W