Teobaldo Depetrini

Teobaldo „Baldo“ Depetrini (* 12. März 1913 in Vercelli; † 8. Januar 1996 in Turin) weer en italieensch Footballspeler un -trainer.

Depetrini gull as agrressiv un loopstark Middlfeldspeler mit stark Physis un goot technisch Qualitäten.

Spelerkarriere

Vereen

Teobaldo Depetrini fung sien Footballloopbahn in sien Heimatstadt bi de SG Pro Vercelli an, wo he an’ 31. Mai 1931 in dat Öller vun 18 Johren ünner József Nagy sien Debüt in de Serie A geev.

Nah dree Speeltieden bi Pro Vercelli, wo he ünner annern mit Silvio Piola tosommen speelt hett, wurr Depetrini in’ Sömmer 1933 vun Juventus Turin, den Serienmeester in de dormalig Tiet, ünner Verdrag nommen. In dat Speel vun de Turiner wurr he nah den Rückträe vun Luigi Bertolini endgültig to en vun de wichtigst Speler vun sien Mannschap. Depetrini un hett bit 1949 – mit en Ünnebreeken bedingt dör den Tweeten Weltkrieg – insgesamt 387 Partien speelt un wunn dorbi tweemal de italieensch Meesterschap un de Coppa Italia.

Mit 36 Johren hett Depetrini de Juve in Richt vun den Lokalrivalen Torino Calcio verlaaten, de nah den Floogtüügafstört vun Superga, bi dat in’ Mai 1949 meest de gesamte Profimannschap to Dood kommen weer, nödig erfohren Speler bruuken dee. 1951 hett Depetrini nah all tosommen 400 Partien in in de hööchste Speelklass vun Italien sien aktiv Loopbahn bi Torino afslooten.

Natschonalmannschap

Sien Debüt in de italieensch Footballnatschonalmannschap geev Depetrini an’ 17. Mai 1936 ünner Vittorio Pozzo bi dat 2:2-Unentscheeden in en Früendschapsspeel gegen de Natschonalmannschap vun Öösterriek in Rom. Ok wegen de stark Konkurrenz up sien Positschoon in’t Middelfeld, broch Depetrini dat bit 1946 blots up all tosommen 12 Lännerspelen.

Trainerkarriere

Nah eenig Engagements bi lüttgere Vereens, dorünner ok Pro Vercelli, de middlerwiel blots noch veertklassig weer, kehr Teobaldo Depetrini 1958 to Juventus Turin torüch un weer in de Saison 1958/59 in de Serie A Co-Trainer vun den Jugoslawen Ljubiša Broćić. Nah de sien Aflösen in’ November 1958 – Juventus harr ünner annern nah en 0:7 gegen den Wiener Sport-Club in de Vörrunn vun den Europapokal vun de Landsmeester verloren un dormit weern de Turiner utscheeden – wurr he de Nahfolger vun Broćić. Depetrini führ de Mannschap um dat Magische Trio Giampiero Boniperti, John Charles un Omar Sívori to Rang veer in de Serie A as ok to’n darten Coppa-Italia-Sieg vun de Vereensgeschichte. To de nee Saison wurr denn Renato Cesarini Juve-Trainer. Depetrini hett denn bit 1969 wieder ünnerklassig Vereens betrüet.

Literatur

Vladimiro Caminiti: Juventus Juventus. Dizionario storico romantico dei bianconeri. Edizioni Elle, Mailand 1977, S. 106, OCLC 3345215.