The Art of Noise

The Art of Noise is en britische Popgrupp, de 1983 vun den Produzent Trevor Horn, den Musikjournalist Paul Morley un de Studiomusikers un -mitarbeiters Anne Dudley, J. J. Jeczalik un Gary Langan grünnt worrn is. De Naam vun de Musikgrupp stammt ut en Essay vun den Futuristen Luigi Russolo.

Historie un Musik

För de dormolige Tiet weer de Musik vun de Grupp bannig nee. Dat weern vör allen instrumentale Stücken un plietsch anleggte Soundcollagen, de op de dormols nee entwickelte Sampling-Technologie baseert hett. The Art of Noise weer een vun de eersten Gruppen, demit den Fairlight-CMI-Sampler arbeit hett.

Na buten hen weer de Grupp as Anti- oder Non-Group ahn Gesicht inszeneert. Dat heet, dat vun de Liddmaten keen Biller rutkamen sünd oder de Musiker blots maskeert op de Plattencovers to sehn weern. De Grupp wull dormit de Verbinnen twüschen de Künstler un dat Kunstwark verwischen.

Wenn een torüch kiekt, warrt The Art of Noise as en Grupp beweert, de sünners kreativ un mit hogen Ansprook mit de dormols noch ne’en Sampling-Technik un de elektroonschen Kläng ümgahn is. In’t Johr 1990 hett sik de Grupp oplöst, is aver 1999 in en ne’e Besetten wedder tosamenkamen, üm noch mol en CD optonehmen. In de Tiet twüschen Oplösen un Wedderverenigen vun de Grupp sünd aver liekers mehrere Best-Of-Alben un Neeoplagen vun olle Stücken rutbröcht worrn.

Diskografie

Alben

Johr	Titel
1983	Into Battle (Mini-LP)
1984	Who’s Afraid Of
1986	In Visible Silence
1988	In No Sense? - Nonsense!
1989	Below the Waste
1999	The Seduction of Claude Debussy
2003	Into Battle with Art of Noise

Butendem sünd tallrieke Best-Of- un Remix-Alben un annere Kompilatschonen rutkamen.

Singles

Reguläre Publikatschonen in chronoloogsche Reeg. Angeven sünd de hööchsten Positschonen un wo veel Weken sik de Titels in de düütschen Single-Charts hollen hebbt.

Johr	Titel	DE
1983	Beat Box (Diversion 1)
1984	Close (To the Edit)
1984	Moments in Love
1985	Legs
1986	Peter Gunn (mit Duane Eddy)	Pl. 17, 12 W.
1986	Paranoimia	Pl. 33, 13 W.
1987	Theme from Dragnet
1988	Kiss (mit Tom Jones)	Pl. 16, 18 W.
1989	Paranoimia ’89	Pl. 41, 9 W.
1989	Yebo	Pl. 49, 9 W.

Bito sünd en VHS/CD-Video (1986) un en DVD (2002) rutkamen.

Weblenken

• The Art of Noise bi MusicBrainz (engelsch)
• The Art of Noise Discography (engelsch)
• Düütsch Interview mit The Art of Noise ut dat Johr 1989 op YouTube