The Shadow of the Eagle

Filmdaten
Plattdüütsch Titel:
Originaltitel: The Shadow of the Eagle
Düütsch Titel: Im Schatten des Adlers
Produkschoonsland: USA
Johr vun’t Rutkamen: 1932
Läng: 12 Episoden, tohopen: 218 Minuten
Originalspraak: Engelsch
Filmkru
Speelbaas: Ford Beebe
B. Reeves Eason
Dreihbook: Ford Beebe
Colbert Clark
Wyndham Gittens
Produkschoon: Nat Levine
Musik: Lee Zahler
Kamera: Benjamin H. Kline
Victor Scheurich
Snitt: Wyndham Gittens
Ray Snyder
Dorstellers

The Shadow of the Eagle (op plattdüütsch so veel as: „De Schadden vun’n Aadler“; dt. Titel: Der Schatten des Adlers) is de Titel vun en US-amerikaansch Serial ut dat Johr 1932. De Hööftrull vun de twölfdeelige Krimireeg speel de dormols noch junge John Wayne.

Inholt ännern

De Film hannelt vun en unbekannten Fleger, de sik sülvst de ‚Aadler‘ nöömt. De sett de Basen vun en Flegerfabrik mit snaaksche Narichten, de he an’n Himmel schrieven deit, ünner Druck un schulligt jem an, sien Utfinnen roovt to hebben. De eerste Naricht weer vun Craig McCoy an’n Himmel schreven, de as Stuntfleger op den lütten Johrmarktsbedrief vun Nathan Gregory anstellt is. He harr dorför veel Geld kregen, wat de Johrmarkt goot bruken künn, un künn mit de Naricht wieter nix anfangen.

Dat stellt sik rut, dat de Fabrikbasen in’n eersten Weltkrieg tosamen in dat glieke Fleger-Schwadron deent harrn, jüst so as ok en rutragen Fleger, de as de ‚Aadler‘ bekannt weer. De ‚Aadler‘ weer een Dag aver vun egen Lüüd afschoten, as he mit en feendliche Maschien op en Spionaasch-Misschoon weer. Nu aver stellt sik rut, dat Nathan Gregory de ‚Aadler‘ ut’n Krieg is, de den Twüschenfall dormols överleevt hett un ünnerduukt weer. Wohrhaftig harr Gregory en Utfinnen maakt, ma he stritt af, wat mit de Naricht to doon to hebben.

In de enkelten Episoden versöcht Craig McCoy mit Hülp vun Gregory sien Dochter Jean un de Anstellten vun den Johrmarkt ruttofinnen, woneem de Plään vun Gregory sien Utfinnen bleven sünd un wokeen sik as de ‚Aadler‘ utgifft, oogenschienlich üm Gregory sien Ansehn to schaden. Dorut warrt en Katt- un Muusspeel, bi dat jümmer wedder Lüüd roovt un wedder befreet warrt. Un jümmer, wenn een opduken deit, de weet wokeen de ‚Aadler‘ wohrhaftig is, passeert wat, noch vördem he wat vertellen kann. So hebbt de Fabrikbasen de hele Tiet Gregory un McCoy in Verdacht, wiel de annersrüm glöövt, dat een vun de Basen de Verbreker is. Butendem gifft dat ok noch de Mackers vun den ‚Aadler‘, de versöökt, beide Sieten gegen’nanner uttospelen.

An’t Enn blieft McCoy un Gregory in’t Recht. Mit en Trick bringt se den wohren Verbreker dorto, sik to verraden. Un wohrhaftig is dat een vun de Basen vun de Flegerfabrik. He kann woll noch mol utneihn, blifft opletzt aver bi en Unfall op de Flucht doot. Gregory sien Unschuld is dormit bewiest un de annern Basen överdrägt em Andelen an de Fabrik, de dör den Doot vun den ‚Aadler‘ free worrn sünd. So is de Arger wedder goot maakt, un McCoy sien Möh hett sik doch noch lohnt.

Produkschoon ännern

The Shadow of the Eagle weer von Mascot Pictures produzeert un an’n 1. Februar 1932 to’n eersten mol wiest. De Serial besteiht ut twölf Episoden, jeedeen so üm un bi 17 Minuuten lang. De eerste Episood is wat länger, de letzte wat körter. Dreiht weer de Filmreeg in Lancaster, Bronson Canyon (Griffith Park) un Antelope Valley in Kalifornien. De Oorheverrechten vun The Shadow of the Eagle sünd intwüschen aflopen, so dat de Film vundaag in de Public Domain is.

Episoden ännern

1. The Carnival Mystery 7. Eagle or Vulture?
2. Pinholes 8. On the Spot
3. The Eagle Strikes 9. When Thieves Fall Out
4. The Man of a Million Voices 10. The Man Who Knew
5. The Telephone Cipher 11. The Eagle’s Wing
6. Code of the Carnival 12. The Shadow Unmasked

Borns ännern

Weblenken ännern