The Tracey Fragments
The Tracey Fragments is en kanaadsch Filmdrama schreven von Maureen Medved un maakt von’n Speelbaas Bruce McDonald. De Roman, von den de Film maakt worrn is, hett Maureen Medved ok schreven. De Hööftrull in’n Film hett Ellen Page.
| Filmdaten | |
|---|---|
| Originaltitel: | The Tracey Fragments |
| Düütsch Titel: | The Tracey Fragments |
| Produkschoonsland: | Kanada |
| Johr vun’t Rutkamen: | 2007 |
| Läng: | 77 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Bruce McDonald |
| Dreihbook: | Maureen Medved |
| Produkschoon: | Sarah Timmins |
| Musik: | Broken Social Scene |
| Kamera: | Steve Cosens |
| Snitt: | Jeremy Munce |
| Dorstellers | |
| |
De Film is in Hamilton, Ontario, dreiht worrn un hett alltohoop 750.000 kanaadsche Dollar köst.
Wo dat üm geiht
ännernDe Film vertellt de Geschicht von de 15 Johr ole Tracey Berkowitz, de ehren Broder verloren hett. De Film wiest jümmer blot korte Utsneed, allens blifft Fragment, eerst ganz bilütten sett sik de Geschicht tohoop. De Fragment-Charakter warrt dor noch von ünnerstütt, dat de Film de ganze Tied temlich dull Deeltbiller bruukt. In de eerste Szeen is Tracey to sehn, de ahn Kleder inwickelt in en Duschvörhang mit’n Bus dör de Stadt föhrt. Se vertellt von ehren Fründ Billy Zero un dat de beiden en Poor sünd. Denn vertellt se von ehren Broder Sonny, de den ganzen Dag so deit, as wenn he en Hund is.
De Tokieker warrt bilütten dör enkelte Utsneed gewohr, dat Sonny verswunnen is un dat Tracey ehr Öllern Tracey Schuld geven doot, dat he verswunnen is, as he mit ehr tohoop ünnerwegens weer. Dat kummt ok rut, dat Tracey in de School von de annern optagen un blot ‚et‘ nöömt warrt, vonwegen dat se so lütt is, keen Bossen hett un ok ans nich mit de annern kloor kummt. De eenzige Lichtblick in de School is Billy Zero, de nee an de School is, een op unafhängig maakt un den Tracey in ehr Gedanken to’n Rockstar hoochböhrt (ok wenn he ehr man kuum beachten deit).
De Utsneed wiest, dat Tracey von tohuus weglopen is, nadem Sonny weg weer un sik op de Söök na em maakt hett. Se kummt bi Lance ünner, de temlich rünnerkamen is un mit illegalen Kraam to doon hett, aver ehr helpen will. As aver een von Lance sien Geschäftspartners vörbikummt un em vörhöllt, dat ut jemehr „Deal“ nix worrn is, löppt de Saak ut de Reeg. De Geschäftspartner sleiht Lance blödig un finnt Tracey, de sik versteken harr. As he sik an ehr vergahn will, snidd se em mit de scharpe Kant von en Konservendoos den Hals op un neiht naakd ut, blot mit en Duschvörhang översmeten. Nadem nu de Tokieker weet, woans Tracey in de Laag kamen is, in de se in de eerste Szeen to sehn weer, warrt he ok wies, woans Sonny verswunnen is. Sonny un Tracey weren ünnerwegens, as Billy Zero mit sien Wagen vörbikummt un Tracey op en Fohrt inlaadt. Tracey seggt nich jo, aver stiggt to em in’t Auto. Billy küsst ehr un hett Sex mit ehr, aver stött ehr na dat Ganze ut’n Wagen un föhrt weg. Dat warrt kloor, dat he ehr blot utnutzt hett un wat Tracey ehrder seggt harr, dat de beiden en Poor weren, dat weer blot in Tracey ehr Fantasie.
Tracey kummt denn wedder hooch von de Eer un söcht na Sonny, den se en beten af von de Steed trüchlaten harr. Aver se kann em nich mehr finnen. Allens wat se finnen kann is, is Sonny sien Mütz, de halv in’t Water an’t Över von’n Beek liggt.
Musik
ännernDe Filmmusik kummt von de kanaadsche Indierock-Grupp Broken Social Scene. Welk Leder kaamt ok von Peaches, Foals, The FemBots, Slim Twig, Rose Melberg un Elizabeth Powell.
Tracey Re:fragmented
ännernTracey Re:fragmented is en Projekt von’n Speelbaas un de Produzenten. Dat ganze Filmmaterial von The Tracey Fragments gifft dat to’n Dalladen ünner en Creative-Commons-Lizenz, dat elkeen dat Material nee tohoopsetten kann, to’n Bispeel üm dor en Musikvideo von to maken, ne’e Trailers to maken oder sogor den Film ganz nee to gestalten. Dat hett von August 2007 bet Januar 2008 en Weddstried geven, un de Winners sünd mit ehr ne’e Version mit op de DVD von’n Film kamen.
Rutkamen un Priesen
ännernDe Weltpremier weer an’n 8. Februar 2007 op de Berlinale. In Kanada hett Odeon Films den Film verdreven, internatschonal Bavaria Films International. De Noordamerika-Premier weer op dat Internatschonale Filmfestival Toronto 2007 un de Film is in’n Oktober 2007 in de kanaadschen Kinos kamen. In de USA hett THINKFilm de Rechten köfft un em an’n 9. Mai 2008 in de Kinos bröcht. De DVD-Rechten för Australien un Neeseeland hett Siren Visual köfft.
Later is von den Film ok noch en Comic maakt worrn, de ok The Tracey Fragments heten hett.
De Film hett 2007 den Manfred-Salzgeber-Pries wunnen un is bi de Berlinale wiest worrn. In’n September 2007 is de Film bi dat Atlantic-Filmfestival in Halifax wiest worrn un hett de Priesen för den besten kanaadschen Speelfilm un för de beste Schauspelerin (Ellen Page) kregen.
2008 weer de Film för söss Genies nomineert, in de Kategorien Speelbaas, Filmsnidd, Schauspelerin in en Hööftrull, Toon, Toonsnidd un adapteert Dreihbook. De Film hett aver keen Pries wunnen.
2009 weer Julian Richings as best Schauspeler in en Blangenrull för en Chlotrudis-Pries nomineert un Maureen Medved för dat beste adapteert Dreihbook.
Weblenken
ännern- The Tracey Fragments in de Internet Movie Database (engelsch)
- Websteed to’n Film (engelsch)