Theodor Otto Münchmeyer

Theodor Otto Münchmeyer (* 19. November 1810 in Veern; † 14. Dezember 1890 ok dor) weer en düütschen Verwaltungsbeamten.

Münchmeyer is an’n 19. November 1810 as Söhn von Sophia Augusta Justina Palm (* 1778), un den Veerner Börgermeester Carl-Christian Münchmeyer (20. Januar 1768–4. Februar 1837) in Veern boren un harr en Twillingssüster (Charlotta Louisa). He is an’n 22. November in’n Veerner Doom döfft worrn. Ok sien Grootvader Andreas Münchmeyer weer al Börgermeester in Veern.

Münchmeyer weer bet 1837 Amtsassesser bi dat Amt Wessen-Thänhusen un is denn Senater un Stadtgerichtsassesser in Veern worrn.

He weer von 1855 bet 1890 Börgermeester von de Stadt Veern. An’n 31. März 1890 is he in Rohstand gahn, von wegen, dat dat mit siene Gesundheit jümmer mehr bargdal gahn is. An dissen Dag is is he ok Ehrenbörger von Veern worrn. En poor Mand later is he an’n 14. Dezember doodbleven.

De Heid in’n Noordoosten von Veern, wat vondaag de Stadtwald is, is op Münchmeyer sien Initiativ opforst worrn.

Na em is ok de Börgermeester-Münchmeyer-Straat in Veern nöömt worrn.

Münchmeyer hett Wilhelmine Caroline Früh freet. De beiden harrn de Kinner Charlotte Auguste (* 4. Februar 1840), Charlotte Louise (* 16. Oktober 1841), Carl Friedrich (* 23. Juli 1843) un Emma Friederica (* 1. Juni 1849).