Thomas Johann Heinrich Mann

Thomas Johann Heinrich Mann (* 22. August 1840 in Lübeck; † 13. Oktober 1891 in Lübeck ) weer en Koopmann un Senator in Lübeck. De beiden beröhmten Schrieverlüde Thomas un Heinrich Mann sünd siene Söhns.

He is boren as dat tweede Kind vun Johann Siegmund Mann jr.( 1797-1863) un den sien Fro Elisabeth Marty (1811-1890). He hett veer Geswister harrt: Elisabeth, Johannes, Olga Maria un Friedrich.

In dat Johr 1862 hett he de Firma Joh.Siegm.Mann, Commissions- und Speditionsgeschäfte öbernahmen. Sien Grootvadder harr düsse Firma 1790 upmaakt. Dat duur man bloß een Monaat, denn is sien Vadder sturben un he dreeg de Last vun dat Geschäft alleen up sien Schullern. He weer denn ok tostännig dorför, wie dat mit de Familie fuddergahn scholl.

1869 hett he Julia da Silva-Bruhns (1851- 1923) heiraat. Ehr Vadder weer de Koopmann Johann Hermann Ludwig Bruhns (1821-1893), de vun Lübeck ut na Brasilien utwannert weer. Ehr Mudder weer Maria Luiza da Silva. Se stamm ut en rieke Planter-Familie, de ut Portugal kamen weer. De beiden hefft fiev Kinner mit'nanner harrt. Dat weern de beiden latern Schriever Thomas un Heinrich Mann, un denn noch Julia, Carla un Viktor.

Vun 1864 af an weer he Königlich Nedderlannschen Konsul. 1877 is he vun den Senat vun de Free Rieksstadt Lübeck to'n Senator för Weertschup un Finanzen wählt wurrn. Na den Börgermeester weer he dor de wichtigst Politiker in Lübeck mit.

An'n 13. Oktober 1891 is he sturben, vunwegen dat he krank weer un Blasenkrebs harrt hett. Ünner de Eer bröcht hefft se em up den Karkhoff bi'n Borgdoor in Lübeck. De speel later ok bi Thomas Mann sien Buddenbrooks en Rull.

In sien Testament hett he verföögt, dat de Firma uplööst weern scholl un dat sien Wohnhuus verköfft weern möss. As Grund hett he angeven, sien Söhns weern „nich so, as he sik dat vörstellt harr“. He hett en groot Vermögen torüchlaten, man dor sünd jümmers bloß de Tinsen vun utbetahlt wurrn. So kunn dat nich verkleiht weern.

Sien Fro is denn ut Lübeck wegtagen un mit de dree jüngsten Kinner na München gahn. 1923 is se in Weßling sturben.

Böker

• Michael Stübbe: Die Manns; Genealogie einer deutschen Schriftstellerfamilie. Verlag Degener & Co., Insingen bi Rothenburg o.d.T. 2004, ISBN 3-7686-5189-4.