Thomas Tapling
Thomas Keay Tapling (* 30. Oktober 1855 in Dulwich, London; † 11. April 1891) weer en engelsch Geschäftsmann un Politiker. Dorben weer he en Cricketspeler un herutragen Philatelist, de de gröttste Sammlung vun Breefmarken in sien Tiet harr.
Leven ännern
Tapling wurr in Dulwich, London boren.[1] He kreeg tonächst Ünnerricht to Huus un dornah af sien 15. Levensjohr an de Harrow School. Dornah hett he dat Trinity College, Cambridge besöcht, dat he 1880 mit en Bacherlor un LL.B as ok 1883 mit en Master un LL.M afslooten hett.[2] Sien glieknamig Vader, weer ok Geschäftsmann, de spoodriek in dat Herstellen vun Teppichen un Huushollensworen weer.[3] Sien Moder weer Annie Elizabeth Tapling (borene Keay).[1]
Tapling hett tonächst sien Loopbahn as Afkaat (Barrister) wieder verfolgt.[1]
1882 is aber sien Vader storven un sien Söhn weer dwungen nu den Familienbedriev to övernehmen. Dat hett he in de Folgetiet woll goot henkreegen, de Bedriev leep bannig goot un wurr grötter. He harr noog Geld, dat he reisen un sien Breefmarkensammlung upbauen kunn.[1]
Cricket ännern
Ok in’t Cricket weer he spoodriek un keem 1886 to en Insatz för den MCC gegen de Cambridge University. 1889/90 sull he ok an en Tour dör Indien un Ceylon deelnehmen, hett aber dorup verzicht, wiel en Früend vun hüm krank in Italien weer un he beslooten harr, de bitostahn.[1]
Politik ännern
Tapling weer en Liddmaat vun dat Parlament för de Harborough Division in Leicestershire in de Johren 1886 bit 1891.
Philatelie ännern
Tapling fung mit dat Breefmarkensammel 1865 an in de 1870er und 1880er Johren hett he nah un nah Sammlungen vun anner bekannt Philatelisten upköfft, so as vun William Image, W.A.S. Westoby, Edward Benjamin Evans, un Gustave un Martial Caillebotte. Bit 1887 harr he en Sammlung, de blots noch vun de Sammlung vun Philippe Ferrari de La Renotière överdrapen wurr. So harr he to’n Bispeel de Root un Blau Mauritius in sien Sammlung, as ok dree Marken vun de Inverted Head Four Annas vun Indien. Dat weer de eenzige private vullständige Sammlung vun all Breefmarken bit to dat Johr 1889.[4]
1870 oder 1871 wurr Tapling Liddmaat vun de Philatelic Society in London (worut nahderhen de Royal Philatelic Society London (RPSL) wurr). 1876 wurr he in den Vörstand beropen.[1] 1881 wurr he Viezpräsident, nahdem sien Vörgänger bi en Iesenbahnunfall to Dood kommen weer.[1] Nah hüm is de Tapling Medal in Sülver nömmt un vun de RPSL eerstmals 1920 vergeeven.[5] De Philatelic Congress of Great Britain hett hüm 1921 mit de Upnahm in de Roll of Distinguished Philatelists uttekent. He hörrt dormit to de 42 Personen, de as fathers of philately (Vaders vun de Philatelie) betekent wurrn.[6][7]
Dood un Vermächtnis ännern
Tapling is mit man blots 35 Johren in Gumley Hall, Market Harborough in Leicestershire an Pleuritis storven.
Sien Sammlung hett he dat British Museum vermaakt un se stellt jetzt de Tapling Collection in de Philatelic Collections of the British Library dor.[8][9]
Enkeld Nahwiesen ännern
- ↑ a b c d e f g "Tapling – The Man Behind the Collection" vun Ron Negus in The London Philatelist, Vol.116, No.1343, März 2007, Sieden 39–47.
- ↑ [1]
- ↑ One-Name Study: Tupling
- ↑ Fred J. Melville, "Our National Stamp Collection", The Connoisseur XI (Jan., 1905) pp. 35–40.
- ↑ "About the Society", Royal Philatelic Society, London
- ↑ The British Philatelic Trust, Who Was Who in British Philately
- ↑ http://www.stamps.org/Almanac/alm_HallofFame_1941.htm] APS Hall of Fame (1941), American Philatelic Society, 1999, afropen an‘ 20. August 2016
- ↑ "Philatelic Collections: The Tapling Collection", British Library
- ↑ The Tapling Collection