Friedhelm Konietzka
Friedhelm „Timo“ Konietzka (* 2. August 1938 in Lünen; † 12. März 2012 in Brunnen SZ, Swiez) weer en düütsch Footballspeler un -trainer.
Konietzka hett mit dat Footballspelen anfungen bi’n VfB 08 Lünen. De dormolige Trainer vun Borussia Düörpm, Max Merkel, hett denn dat Talent opdeckt un hett hüm in de Böverligamannschap vun de BVB insett. Tosommen mit sien Störmerkolleeg Jürgen „Charly“ Schütz bild he de doorgefährlichste Binnenstorm in de Böverliga West. In dat Johr 1965 is he denn vun Borussia Düörpm nah TSV 1860 München wesselt. För de Düörpmers hett he in 53 Spelen immerhenn 42 Mal in’t Door drapen un för de Münchners keemen nochmol 47 Spelen dorto mit 30 Doren.
Ok för de düütsche Natschonalmannschap hett he speelt un in 9 Begegnungen 3 Doren schaaten.
In dat letzte Endspeel üm de düütsche Football-Meesterschap is he 1963 mit Borussia Düörpm Düütsch Meester wurrn, nahdem se mit 3:1 tegen de favoriseert Kölners wunnen harrn.
Friedhelm Konietzka is aber in de Footballhistorie ingahn, as he an 24. August 1963 bi date erste Speel tüschen Werder Bremen un Borussia Düörpm in de eerste Speelminüt dat eerste Door in de nee grünnd Bundsliga för Düörpm schaaten hett.
Sien gröttste Erfolge as Speler weern de Sieg in dat DFB Pokal-Endspeel 1965 mit Borussia Düörpm un de düütsche Meesterschap mit Borussia Düörpm 1963 un 1860 München 1966.
Nah sien aktive Tiet weer he Trainer bi Borussia Düörpm, Bayer Uerdingen, FC Zürich und den Grasshopper-Club Zürich. Mit de FC Zürich is he dreemal in Folg Swiezer Meester wurrn (1974-1976). 1977 is he mit disse Vereen ok in dat Halvfinale vun de Europacup vun des Landsmeesters (wat hüdtodag de Champions-League is) kommen, aber tegen FC Liverpool rutflogen. Vun 1978 bis 1980 weer he denn noch Trainer bi BSC Young Boys.
Toletzt weer Konietzka, de 1988 de Swiezer Staatsbörgerschap annommen harr, as Weertsmann an de Veerwaldstädter See tätig, tosommen mit sien Frau Claudia. Sien Ökelnaam "Timo" hett he laterhen to sien richtigen Naam makt.
Nahdem in' Februar en nich to heelen Gallengangskarzinom faststellt wurrn weer, hett Konietzka an' 12. März 2012 mit Hülp vun de Swiezer Starvenshelporganisatschoon Exit, de he all siet Johren apenlich ünnerstütt hett un för de he as Botschaper tätig weer, sien Leven en Enn' sett.[1]
Weblenken
ännern- [1] Konietzka bi Fußballdaten.de (hoochdüütsch)