Tio João (egentlich Amândio Nicolau Sernadela; * 1968) is en Radiomann ut Portugal.

Sernadela weer Radioredaktör in Bragança in Noordportugal. 1989 keem he op de Idee, dat he sik siene Tohörers as Tio João (Unkel Jehann) vörstellen dee un se opropen dee, dat se em as en Deel vun de Familie ansehn schullen un em vertellen schullen, wat jem bewegen dee. He wull dor mit gegen de Eensamkeit vun de Minschen in de Dörper in Noordportugal gegenan, woneem faken de jungen Minschen wegtagen sünd un blot en poor ole Minschen nableven sünd. Se schullen ene grote Radiofamilie wesen, de sik gegensiedig jemehr Sorgen un Freiden anhöörn deen. Jem Mood maken. Oder dat een vun de Tohörers eenfach mal per Telefon op de Mundharmonika wat vörspeelt oder wat singt. ’Keen öller is, warrt in de Radiofamilie as Tio oder Tia ansnackt (Unkel un Tant), de jüngern oder unverheiraadten as Primos un Primas (Cousin un Cousien). Ok grote Drepen warrt elk Johr maakt, wo bi 20.000 Lüüd to ene Fier oder en Picknick tohoop kaamt. In mehr as 2200 Dörper in Portugal un dat benaverte Spanien hett de Radio-Familie vun Tio João Mitgleder.

De Sendung Bom Dia Tio João löppt jeden Dag vun veerdel na söss morgens twee Stünnen un Sünnavends veer Stünnen op RBA, Radio Bragança.