To de twölv Apostels (Demost)

To de twölv Apostels oder kort de Apostelkark in Demost is en evangeelsch-luthersche Kark von de Ollnbörger Landskark (Karkenkreis Demost/Ollnborg Land). De Backsteenkark liggt in de Breslauer Straat in’n Demoster Stadtdeel Düüsternoort un hett üm un bi 4500 Maten.^[1]

To de Kark höört ok en Kinnergoorn un en Kinnerkrübb.

Historie

Na’n Tweten Weltkrieg harrn sik vele Verdrevene in Düüsternoort dallaten un de Stadtdeel is gau wussen. De evangeelsche Kark hett dor dorüm Goddsdeensten afhollen, de toeerst in en Barack stattfünnen. 1952 hett de Stadt Demost de Kark en Grundstück geven, op dat en ne’e Kark för’n Stadtdeel boot warrn schull. De Kark harr an’n 25. November 1953 Richtfest un is an’n 31. Oktober 1954 inwieht worrn.

De Toorn is 42 Meter hoog.^[2] De Toorn besteiht ut en 30 Meter hoog quadraatsch Toornschacht, op den acht Pielers opsett sünd, de acht Meter hoog sünd.^[2] Op de Pielers wedder sitt en koppern Dack, op dat baven en Toornspitz mit Kugel un en Engel mit Posaun anbröcht is.^[2]

Twüschen de Pielers von’n Toorn hängt dree Klocken ut Stahl, de von’n Bochumer Verein herstellt worrn sünd.^[2] De eerste Klock is 1954 gaten worrn un wiggt bi en Dörmeter von 92 cm 300 kg.^[2] De twete Klock is von 1956 un wiggt bi en Dörmeter von 104 cm 440 kg.^[2] De drüdde Klock von 1959 wiggt bi en Dörmeter von 126 cm 780 kg.^[2]