Torfrock
Torfrock is en half plattdüütsche Grupp ut den hogen Noorden. De wurr 1977 von Klaus Büchner un Raymond Voß grünnt.
Historie
ännernDe Musikers hebbt sik to’n Deel al Mitt vun de 1970er Johren drapen. Büchner un Voß hebbt vör Torfrock tosamen mit annere Musikers de Folk-Grupp Basia grünnt hat, de in Hamborg an’t Ernst-Deutsch-Theater arbeit hett un dor optreden is. Jemehr Leder weern anlehnt an de Literatur vun Edgar Allan Poe un annere. To de Tiet harr Büchner den Infall Leder ünner annern vun Jimi Hendrix mit plattdüütsche Texten vörtodrägen. De de Tokiekers keem dat unvermodens goot an, wat to dem Plaan föhrt hett, en Grupp to grünnen, de sik mit Humor befaten deit. To dat Kunzept höör ok, Geschichten ut den Alldag vun dat „tyypsch noorddüütsche“ fiktive Dörp Torfmoorholm to vertellen as jüst so ok över de Wikinger-Tiet. Blangen Bücher un Voß weern dormols Thomas Rieckmann (Texten, Bass, Singer), Reinhard Heinrichs (Texten, Percussion, Singer) un Gunnar Kämmer (Percussion, Slagtüüch) Liddmaten vun Torfrock. Bekannt worrn is de Grupp toeerst blots in’n noorddüütschen Ruum, de in de Leder thematiseert weer. De eerste Phass vun Torfrock güng mit dat Opkamen vun de Neue Deutsche Welle toenn.
De Musikers hebbt sik dorna mit annere Projekten befaat. So bestünn de Grupp Hammaburg to’n gröttsten Deel ut de glieken Lüüd un ok jemehr Single weer dicht an de Musik vun Torfrock. Voß un Kämmer hebbt denn 1982 de Grupp Eltern haften für ihre Kinder grünnt, de sik mit eernste Themen befaat hett. Den gröttsten Spood harr Klaus Büchner in de 1980er un 1990er Johren as de „Lütte Klaus“ vun dat Slager-Duo Klaus und Klaus tosamen mit Klaus Baumgart. Raymond Voß hett sik twüschendör an de Texten bedeeligt. Vele vun de Leder sünd later denn as Torfrock nee bruukt worrn. Voß un Büchner hebbt ok ünner egenen Naam Singles opnahmen.
Enn vun de 1980er Johren is Torfrock denn wedder tosamenkamen. Enkelte Optreden wiesen sik unvermodens as teemlich spoodriek. Dorto keem de bundswiete Dörbrook mit dat Titelleed to Werner – Beinhart!, de eerste Film to de Werner-Comic-Reeg. Dorophen hett de Grupp beslaten, wedder ne’e Musik to publizeren un op Tournee to gahn. Blangen lüttere Optreden dat hele Johr över geev Torfrock nu ok jeed Johr to Wiehnachten Kunzerten in verschedene Städer in Noorddüütschland, de as „Bagalutenwiehnacht“ bekannt worrn sünd.
Enn vun de 1980er Johren bleev Thomas Rieckmann doot. An sien Steed keem Uwe Meitzner nee in de Grupp. Op Voß sien Wunsch hen, Torfrock mehr to en Rockgrupp uttoboen, keem wieter ok de Solo-Gitarrspeler Jürgen Lugge dorto. Liekers geev dat wietere tosätzliche Projekten. tosamen mit de Liddmaten vun The Rattles is to’n Bispeel en Maxi ünner den Naam Hoellenhunde rutkamen. Voß süng ok för Jay Stapley, den Gitarrspeler vun Marius Müller-Westernhagen, op de Single Orient Express. Anfangs geev dat wieter ok noch dat Projekt Klaus und Klaus, wo Büchner Anfang vun de 1990er Johren aver utstegen is, as sik beids tosamen nich mehr ünner een Hoot bringen laten hett. ’N beten later geev dat aver Striet in de Grupp. Butendem is unvermodens Jürgen Lugge doodbleven.
Na disse Krise bestünn Torfrock wedder ut veer Lüüd. Lugge sien Platz is free bleven ut Respekt för sien Leistung, de nich vun annere övernahmen warrn künn. Blangen Büchner un Voß weern noch Volker Schmidt an’n Bass un de Slagtüüchspeler „Olliwood“ Marc-Oliver Steinwede in de Grupp. Steinwede is üm den Wessel 2009/2010 ut de Grupp rutgahn. För em keem Stefan Lehmann vun de Grupp Ohrenfeindt, de mehrere Johren mit Torfrock op Tour güngen.
Musik
ännernTorfrock is mit den Infall tostannen kamen, Klassiker ut de Rockmusik mit plattdüütsche Texten to spelen, so as „Let’s Work Together“ vun Wilbert Harrison (Let’s wörk togesser), „Carol“ vun Chuck Berry (Karola Petersen) oder „Hey Joe“ vun Jimi Hendrix (He Jo). Man, al op dat eerste Album duukt ok sülvst schrevene humoristishe Leder op, de op Hoochdüütsch mit en starken noorddüütschen bit plattdüütschen Akzent vördragen warrt.
en Deel vun de Leder speelt in de Nutiet un beschrievt dat Landleven to’n Bispeel vun de Torfsteekers in’t fiktive Dörp Torfmoorholm oder annere Figuren as den Torfsteekermeester „Adular Zech“, den Direkter vun’t Amt för Öllerdomsforschen „Willi Wühlkelle“, den Baggerföhrer „Hannes Kabeltod“ usw. De Texten hebbt dorbi tomeist en satirischen Inslag un befaat sik geern ok mit dat Utövern vun de Freetietsellschop.
Faken warrt ok volksdömlich-histoorsche Geschichten üm den Wikinger-Oort „Haithabu“ utspunnen, de sik tomeist üm Rollo dreiht, en roothoorten, ruugbeenten Wikingerhööftling, de geern en drinken deit un vörgeevlich en bedüden Rull bi’t Opdecken vun Amerika speelt hebben schall. Dat Leed Volle Granate, Renate beschrifft en Wikingerfro mit densülven Naam un hett jüst in Noorddüütschland Kultstatus innahmen.
Sellschopplich Doon
ännernAs dat Anfang vun de 1990er Johren to rechtsradikale Övergrepen in Rostock-Lichtenhagen kamen is, hett Torfrock in Interviews un bi en Akschoon vun de Hamborger Morgenpost Teken gegen Utlännerfeendlichkeit sett. De Grupp ünnerstütt de Arbeit vun de Düütsche Sellschop to’n Redden vun Schippbröökige dör Verkööp vun jemehr Gruppenklenners un mit de Single „Search And Rescue“ (SAR) vun 2007. In den Text vun de Single warrt de harde un gefährliche Arbeit vun den Seenoothelpsdeenst thematiseert.
Diskografie (Utwahl)
ännern- 1977: Dat matscht so schön
- 1978: Rata-ta-zong
- 1979: Torfrockball im Hühnerstall
- 1980: Vierter Versuch
- 1982: Mein Gott, sind wir begabt
- 1983: Torfmoorholmer Hitparade
- 1990: …Alle an die Ruder!
- 1991: Torfrock oder Watt? (Remix)
- 1992: Die Bagaluten-Fete (Live)
- 1994: Goiler Tonträger
- 1996: Rockerkuddl
- 2001: Einigkeit und Blech und Freizeit
- 2002: Die Beinharte Bagaluten-Wiehnacht (Live)
- 2010: Neues aus Torfmoorholm (Kumpilatschoon)
Utteken
ännern- 1991: RSH-Gold in de Kategorie „Soundtrack vun’t Jahres“ för Beinhart
- 2008: Noord-Award
