Dit Woort hett noch annere Bedüden: kiek dorför ünner Tsunami (Mehrdüdig Begreep).

En Tsunami (japaansch 津波, Havenbulge; ut 津 tsu, Haven, un 波 nami, Bulge, Wagge) is en Bulge, de gau över de See henlopen deit. Tomeist geiht dat mit ehr los vunwegen en Eerdbeven an den Grund vun de See (dor warrt faken ok „Seebeven“ to seggt).

De Tsunami dunnert an’n 26. Dezember 2004 gegen de Küst vun Thailand

Vun Tsunamis warrt woll ok faken as vun en Floot snackt, man mit de Tieden vun Ebb un Floot, so, as wi de kennen doot, hefft de gor nix to kriegen. Ok Wind oder Storm bringt keen Tsunami tostanne. Se schöllt ok nich mit Riesen- oder Monsterbulgen dör'nanner smeten weern.

Up de hoge See sünd de Tsunamis man knapp to spören, man dicht ünner Land könnt starke Tsunamis groten Schaden mit sik bringen un ganze Küstenstreken in Dutt leggen. So en forchterlichen Tsunami is an’n 26. Dezember 2004 bi en Seebeven bi Sumatra losgahn un hett rings üm den indischen Ozean mehr as 230.000 Minschen to Dode bröcht. An'n 11. März 2011 sund bi den Tsunami na dat Eerdbeven vun Sendai 2011 ganze Landstreeke, Städer un Dörper an de Oostküst vun Japan overswemmt un to'n Deel wegspöölt wurrn.