Ulrich II. (Oostfreesland)

Ulrich II. (* 6. Juli 1605; † 1. November 1648 in Auerk) hett nah den unverwachten Dood vun sien Bröer Rudolf Christian an' 17. April 1628 dat Amt vun den Grafen vun Oostfreesland antreeden. He weer dat fievte Kind ut de tweete Ehe vun den Grafen Enno III. un de Gräfin Anna Prinzessin von Holstein-Gottorp. In sien Regeerenstiet full de Dartigjohrig Krieg, in de Oostfreesland groot Not ünner de Taten vun de Truppen vun den Grafen Peter Ernst II. von Mansfeld to lieden harr. De eenzig Utnahm weer Emden, wiel de kört tovör fardigstellt Emder Wall de Stadt vör de Innahm dör frömd Truppen schuulen dee.

Ulrich II., Gemälde üm un bi 1750

Leven

De Geschichtsschrieven stellt Ulrich II. in' Grooten un Ganzen en schlecht Tüügnis ut. Sien Bröer Rudolf Christian is unverwacht storven. He kreeg en Steek in dat linke Oog bi en Striet vun en Lieutenant vun dat to Berum in Quartier liggenden kaiserlichen General Gallas up de Borg Berum. Blots wedderstrevend harr he dat Amt vun den Grafen vun Oostfreesland antreeden. Man seggt hüm nah, dat he en Levemann ween is, den de Genuss vun Alkohol un Speisen groot Lüst bereiten dee. Dat Drieven vun de utwärtig Truppen in den Dartigjohrigen Krieg in Oostfreesland hett he sück ankeeken, aber nichts dorgegen ünnernommen. An Stäe vun dat hett he dat Land mehr oder vun de Kanzlern Wiarda un Bobart verwalten laaten. He gung man so wiet, midden in den Krieg för sien Gemahlin, de hessische Landgräfin Juliane, en Park errichten to laaten, de Julianenborg. De Bevölkerung vun Oostfreesland harr to disse Tiet bittere Not to lieden.

Liekers gifft dat in sien Regeerenstiet eenige bedüüdend Entscheeden vun Ulrich. Mit de Verpachtung vun Moorflächen bi Timmel fung 1633 de Fehnkultur an, as deren eerst Tüügnis dat ut de Verpachtung entstahn Grootfehn gellt. Ut Stiftungen vun dat Landsvermögen entstunnen 1631 in Nörden un 1646 in Auerk Gymnasien, de hüüd noch as Ulrichsgymnasium un Ulricianum sien Naam dragen.

Familie

1631 hett he Juliane von Hessen-Darmstadt (* 14. April 1606; † 15. Januar 1659), Dochter vun Ludwig V. von Hessen-Darmstadt un Magdalena von Brandenburg (* 7. Januar 1582; † 4. Mai 1616) heiraadt. Dat Paar harrn folgen Kinner:

• Enno Ludwig (* 29. Oktober 1632; † 4. April 1660) ∞ 7. November 1656 Justine Sophie von Barby (* 14. April 1636; † 12. August 1677)
• Georg Christian (* 6. Februar 1634; † 6. Juni 1665) ∞ 10. Mai 1662 Christine Charlotte von Württemberg (* 21. Oktober 1645; † 16. Mai 1699)
• Edzard Ferdinand (* 12. Juli 1636, † 1. Januar 1668) ∞ 22. Juli 1665 Anna Dorothea Gräfin von Criechingen († 20. Mai 1705)

Nah sien Dood hett sien Wittfru Juliana wegen de Minnerjohrigkeit vun hör Kinner de vörmundschaplich Regeeren övernommen.

Literatur

• P. Wagner: Ulrich II. (Graf von Ostfriesland). In: Allgemeine Deutsche Biographie (ADB). Band 39, Duncker & Humblot, Leipzig 1895, S. 229–231.
• E. Esselborn: Das Geschlecht der Cirksena. Die Häuptlinge, Grafen und Fürsten von Ostfriesland. Berlin 1945. S. 103-108.