Ulrich Inderbinen
Ulrich Inderbinen (* 3. Dezember 1900 in Zermatt; † 14. Juni 2004 ok dor) weer en Swiezer Bargführer un Bargstieger. He hett 371-mal dat Matterhorn, 84-mal den Mont Blanc un 81-mal de Dufourtipp, den hööchsten Barg vun de Swiez besteegen.
Leven un Werdegang
ännernDe Söhn vun Bargbuern is mit acht Geschwistern upwussen. Mit fief Johren hett he as Kohhöder arbeit. Geld hett he all in dat Öller vun 13 Johren verdeent, as Schaaphöder, later as Bauarbeiter, Discher oder Elektriker.
1921 hett he tosommen mit sien Süsters dat eerste Mal dat Matterhorn besteegen. 1925 hett he de Bargführerschool afslooten, aber eerst um de 1960er-Johren harr he wegen den touristischen Upswung utreckend Arbeit as Bargführer. Weltwiet funn Inderbinen 1990 Beachtung, as he in’ Rahmen vun en Feernsehsennen to’n 125. Johresdag vun de Eerstbestiegen vun den Matterhorn as nu 89-Johriger noch eenmal up den Tipp steeg.
Mit 80 Johren fung he an, bi Skirennen deeltonehmen. Wiel dat in sien Öllersklass meestens kien anner Deelnehmers mehr geev, wunn he meestens. Mit 95 Johren nehm he letztmals an en Bargführer-Skirennen deel.
Wenig Interesse wies Inderbinen an neetietlich Sekerungsmethoden. So führ he noch 1983 sien Touristen mit en Tau um’t Liev dör de Gletscherbrüche.
Letzte Johren
ännernInderbinen hett bit to sien 96. Levensjohr as Bargführer arbeit. En Stört hett hüm dwungen, de Bargführerloopbahn aftosluuten. Mit 96 Johren hett sück de gloovende Katholik en Levensdrööm erfüllt: He is nah Rom reist, um den Segen vun Paapst Johannes Paul II. to empfangen. In dat Johr 2000 hett hüm de Gemeend Zermatt to sien 100. Gebortsdag en Utstellung widmet un en hüm widmet Pütt in’ Oortskarn vun Zermatt wurr inweeht. 2004 is he in sien 104. Levensjohr storven. To dissen Tietpunkt weer he de öldste Mann in den Kanton Wallis.
Literatur
ännern- Heidi Lanz, Liliane De Meester: Ich bin so alt wie das Jahrhundert. Rotten, Visp 1996.