Untogänglich Natschonalpark vun Bwindi
| Untogänglich Natschonalpark vun Bwindi | |
|---|---|
| Staat | Uganda |
| Laag | Koordinaten:0° 57′ S, 29° 40′ O0° 57′ S, 29° 40′ O |
| |
| |
| Grött | 310 km² |
| Levensruum | troopsch Oorwoold |
| Inricht | 1932 |
| Opsicht | Wildamt vun Uganda |
| IUCN-Kategorie | II – National Park |
| Attrakschoon | Barggorillas |
| Websteed | www.uwa.or.ug/bwindi.html |
De Untogängliche Natschonalpark vun Bwindi (engelsch Bwindi Impenetrable National Park) is en Natschonalpark in’n Süüdwesten vun Uganda dicht an de Grenz to de Demokraatsche Republiek Kongo. He liggt an’n Rand vun den Albert-Graven un besteiht ut Regen- un Oorwoold. De Natschonalpark is Heimat vun 300 Barggorillas, wat de Hälft vun alle Barggorillas is, de free leevt. De twete Grupp vun Barggorillas leevt in de Virunga-Bargen (in Uganda schützt dör den Mgahinga-Gorilla-Natschonalpark).
Historie
ännernDe Park is 1932 inricht worrn. He heet toeerst Impenetrable Forest Reserve (dat Untogänglich-Woold-Reservat) un siet 1991 denn Bwindi Impenetrable National Park. Bwindi is de Naam vun’n Woold, doch toerst heet so en Sump in’n Süden vun’n Woold. Mubwindi bwa Nyinamukari, Nyinamukari ehr düüster Oort, seggen de Lüüd dorto, vun wegen dat woll vör över eenhunnert Johren ene Familie vun Süden dör den Sump trecken wull. Doch dor weer keen Dörkamen. Trüch kunnen se nich mehr, dorüm fragen se de Sumpgeester üm Raat. De seggen, dat se ehr schöönst Dochter Nyinamukari as Opper geven schullen. Na veel Tögern hebbt se – se kunnen ja nich trüch – dat denn doon un ehr Dochter in dat Water smeten. De Familie kunn ahn Gefohr dör den Sump wannern. As annere Lüüd dat hören, möken se vun de Tied an en groten Bagen üm den Sump, un de harr sien Naam weg.
Geografie
ännernTo den Natschonalpark höört de Süüddeel vun den Distrikt Kanungu, de Noorddeel vun Kisoro un en lütt Rebeet in’n Westen vun Kabale. De wichtigste Oort is Buhoma an den Stroom Munyaga in’n Kanungu-Distrikt. Dör den Noorden vun den Park deit de Stroom Ishasha fleten. De Park liggt twischen 1.160 m un 2.607 m över NN (de hööchste Punkt is de Rwamunyoni-Barg). Op dat Rebeet vun den Park leevt ok noch en poor lütte Gruppen vun Batwa-Pygmäen.
Flora un Fauna
ännernIn’n Park leevt Elefanten, Guerezas, Schimpansen un annere Apen-Oorden un verschedene Soorten Antilopen.
Alltohoop leevt in Bwindi so wat 120 Oorden vun Söögdeerter un 350 Oorden vun Vagels, dorvun 23, de blots hier to Huus sünd. Todem 200 Oorden vun Botterlickers un 160 Oorden vun Bööm. Regen fallt in’t Johr üm un bi 1.500 mm.