Unwedder över Flakenbrook

Unwedder över Flakenbrook is en Theaterstück in dree Törns för acht Personen (veer Froonslüüd, veer Mannslüüd; ene Deko), dat Karlheinz Komm schreven hett. Toeerst opföhrt worrn is dat Stück in de hoochdüütsche Version an’n 23. Februar 1996 op’n Saal Rickmeyer in Retzen.

In’t Plattdüütsche översett hett dat Klaus Lensch 1996, de hoochdüütsche Originalversion heet Gewitter in Flakenbruch. Dat gifft ok en westfäälsche Version, de Teresa Blümke översett hett, Unwiär üöwer Nottrup. Unwiär üöwer Nottrup hett sien Premier an’n 7. März 2009 op’n Saal Denter in Notteln.

Dat Stück is ok in’t Swääbsche (Gwiddr en Wiesabach von Eduard Smetana) översett worrn.

De Komödie speelt in dat Dörp Flakenbrook (westfäälsch Nottrup, Kufferwoord ut Notteln un Darup). Dor gifft dat blot een lütten Laden, de von Emma Hugenbüttel (Emma Güldenberg). De Laden is de Middelpunkt von’t Dörp. Aver Buur Feldmann will sien Hoff opgeven un verköfft sien Land. Intressent för sien Land is en Supermarkt-Keed, de dor en Laden opmaken will. Emma mutt nu mit allerhand Tricks tosehn, dat se dat verhinnert.