Uwe Harden

Uwe Harden (* 22. Februar 1952 in Geesthacht) is en düütschen Politiker von de SPD.

Harden is 1952 in Geesthacht boren. Na dat Abitur weer he twee Johr lang bi’n Grenzschutz in Lümborg. He hett denn Slawistik un Politologie an de Universitäten Göttingen un Hamborg studeert. 1981 is he Verleger un Journalist worrn. He is verheiraadt un hett twee Kinner.

1971 is Harden in de SPD rin. He is 1976 Raadsherr von de Samtgemeen Elvmasch worrn un weer dor Vörsitter von de SPD-Frakschoon. Ok in’n Raad von de Gemeen Draag weer he un is dor 1991 Börgermeester worrn. Von 1986 bet 1997 weer he Afornten in’n Kreisdag von’n Landkreis Horborg. Von 1994 bet 2008 (13. bet 15. Wahlperiood) weer Harden Maat von’n Landdag von Neddersassen. In de 13. un 14. Wahlperiood is he för den Wahlkreis Winsen wählt worrn (1994 42,8 % un 1998 48,2 % von de Stimmen) un in de 15. Wahlperiood is he över de Landslist in’n Landdag intagen. He kunn sik bi de Wahl 2003 mit 31,1 % von de Stimmen nich gegen André Wiese von de CDU (58,9 %) dörsetten.

Harden is Vörsitter von de Börgerinitiative gegen Leukämie in de Elvmasch un Maat von de Arbeiderwollfohrt un dat Düütsche Rode Krüüz.

Weblenken

• Harden sien Websteed (hoochdüütsch)