Véronique Claudel (* 22. November 1966 in Cornimont) is en ehmalge franzöösch Biathletin.

Véronique Claudel weer gegen Enn’ vun de 1980er- un in de eerst Hälft vun de 1990er Johren en vun de spoodriekst Biathletinnen vun de Welt. Hör eerst Biathlon-Weltmeesterschapen leep Claudel in Feistritz an der Drau, reck aber mit Staffel un Team jewiels blots den achten Platz. 1990 wurr se in dat Eenzel vun Minsk Negente. In Lahti verpass Claudel 1991 mit de Staffel up den veerten Platz en eerste Medaille. Hör eerste Olympisch Winterspelen leep se 1992 in Albertville. Bi de Spelen in hör franzöösch Heimat, bi de eerstmals Biathlonrennen vun Fruen in dat Olympisch Programm weern, wunn se mit Corinne Niogret un Anne Briand de Goldmedaille in’ Staffelwettbewarf (dormals noch mit blots dree Starterinnen) vör de Mannschap ut Düütschland. Fiev Daag later verpass se en tweet Medaille in’ Eenzel blots um 6,2 Sekunden gegen Myriam Bédard un keem up den veerten Platz. Twee Johr later wunn se bi de Spelen vun Lillehammer mit Niogret, Briand un Delphyne Burlet in dat Staffelrennen de Bronzemedaille. Dorto keem in dat sülvig Johr de Bronzemedaille in den Teamwettbewarf vun de Biathlon-Weltmeesterschapen 1994 in Canmore. Se harr all bi de Weltmeesterschapen in dat Johr tüschen de beid Olympisch Spelen mit Niogret, Burlet un Briand achter de tschechisch Staffel de Sülvermedaille wunnen.

Ok dornah reck Claudel wiederhen internatschonalen Erfolg vör allen in’ Staffel- un Teamwettbewarf. Bi de Biathlon-Weltmeesterschapen 1995 in Antholz wunn se gemeensam mit Niogret, Briand un Delphyne Heymann achter de düütsch Staffel Sülver, mit Niogret, Briand un Emmanuelle Claret in’ Teamwettbewarf Bronze. 1997 keem Claudel mit dat Team in Osrblie noch eenmal up den fievten Platz. In’ Weltcup belegg Claudel in de Saison 1987/88 den teihnten, 1991 den achten un 1993 weer den teihnten Rang in de Gesamtwertung. Nah de Saison 1997/98 hett se hör Loopbahn afslooten.

Weblenken ännern