Vagelgripp warrt een Vagelkrankheit nöömt, de vun Influenza-Viren her kümmt.

Dat Woort Vagelgripp is nich düütlich. Op de een Siet seggt een dat an Stäe vun dat offiziell bruukte Woort Vagelpest, op düütsch Geflügelpest un in engelsche Spraak, so as dat international begäng is, HPAI (high pathogen avian influenza). Vun düsse Süük gaht Vagels doot. Op de anner Siet seggt een Vogelgripp ok to een Soort grippal Infekt bi Vagels. Dor gaht de nich vun doot. Düsse Soort Süük warrt op engelsch LPAI (low pathogen avian influenza) nöömt.

In de leste Tiet warrt dat Woort Vagelgripp in de Medien meist blots för de Oort vun düsse Krankheit bruukt, bi de de besünnere Virus H5N1 in't Speel is.

Just so as bi all anner Süken vun dat Fedderveeh, bi de een Virus vun de Influenza in't Speel is, mutt de Krankheit bi de Behörden anmellt weern, wenn se eenerwegens utbraken is.

In den een oder annern Fall is dat in de verleden Johren vörkamen, datt de Virus ok op Söögdeerten övergahn is.