Veernermoor
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27308 | |
| Vörwahl: | 04238 | |
| Geograafsche Laag: | Koordinaten:52° 55′ N, 9° 24′ O52° 55′ N, 9° 24′ O | |
|
| ||
Veernermoor (hoochdüütsch Verdenermoor) is en Dörp in de Gemeen Kerklinneln in’n Landkreis Veern, Neddersassen. Binnen de Gemeen Kerklinneln höört de Oort to de polietsche Oortschop Kükenmoor.
Geografie ännern
De Oort liggt in en Hoogmoor op de Achem-Veerner Geest. Delen von düt Moor in’n Oosten sünd as Naturschuulrebeed Veerner Moor schuult un in’n Noordwesten as Höhnermoor. Dat Water ut dat Rebeed warrt över Gravens in’n Süden na de Lehrde hen afföhrt un in’n Noorden na’n Gohbeek.
De Naveröörd sünd Kükenmoor in’n Noorden, Lüttjen Heinz, Groten Heinz un Goldborn in’n Noordoosten, Idsen, Hamwie’e un Owe in’n Süüdoosten, Ihlden un Lehrn in’n Süden, Saasloh, Neernabargen un Armsen in’n Süüdwesten un Specken, Ramels un Neenföör in’n Noordwesten.
Historie ännern
De Veerner Bischop Christoph hett 1551 dat Rebeed von dat hüdige Dörp de Süderstadt Veern schenkt, dat se dor Törf to’n Böten graven kunnen. Leevt hett dor to de Tied noch nüms. Eerst in dat 18. Johrhunnert is dat Moor dröögleggt worrn un de eersten Hüüs sünd dor boot worrn.
In’n Eersten Weltkrieg sünd twölv Soldaten ut Veernermoor fullen oder vermisst un in’n Tweten Weltkrieg söss.[1]
Verwaltungsgeschicht ännern
In de Franzosentied von 1810 bet 1814 hett de Oort to de Mairie Kerklinneln in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Vaagdie Kerklinneln in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.
De Oort is an’n 1. Juli 1972 mit de Gemeenreform in Neddersassen Deel von de Gemeen Kerklinneln worrn. De beiden Gemenen Kükenmoor un Veernermoor hebbt dorbi tohoop de Oortschop Kükenmoor billt.
Inwahnertall ännern
| Johr | Inwahners |
|---|---|
| 1812[2] | 26 |
| 1848[3] | 95 Lüüd, 16 Hüüs |
| 1. Dezember 1871[4] | 99 Lüüd, 17 Hüüs |
| 1. Dezember 1885[5] | 96 Lüüd, 18 Hüüs |
| 1. Dezember 1905[6] | 105 Lüüd, 19 Hüüs |
| 1. Dezember 1910[7] | 109 |
| 1925[8] | 102 |
| 1933[8] | 95 |
| 1939[8] | 93 |
Religion ännern
Veernermoor is evangeelsch-luthersch präägt un höört to dat Kaspel von de Petrus-Kark in Kerklinneln.
För de Kathoolschen is de St.-Josef-Kark in Veern tostännig.
Kultur ännern
En Denkmaal för de Fullenen ut de twee Weltkrieg’ steiht in Veernermoor op’n Karkhoff.
Verenen ännern
De Schüttenvereen Veernermoor-Kükenmoor is 1924 in Veernermoor grünnt worrn.
Weertschop un Infrastruktur ännern
För Veernermoor is de freewillige Füürwehr Kükenmoor mit tostännig.
1932 is en Plichtfüürwehr in Veernermoor grünnt worrn, de 1934 en Füürlöschverband mit Kükenmoor un Heinz grünnt hett. An’n 12. Oktober 1951 hett sik en freewillige Füürwehr grünnt un de Plichtfüürwehr is oplööst worrn. Aver al 1958 sünd de Füürwehren in Veernermoor un Kükenmoor as Freewillige Füürwehr Kükenmoor tohoopgahn.
Verkehr ännern
De eenzige gröttere Straat ut Veernermoor rut löppt in’n Noordwesten an de Kreisstraat 13, de in’n Noorden dör Kükenmoor un an de Landsstraat 171 ran geiht un in’n Süüdwesten na Neernabargen un an de L 160 ran. De L 171 föhrt in’n Westen na Kerklinneln un Veern un in’n Oosten över Lüttjen Heinz un Jeddingen na Visselhöövd.
De nächste Autobahn is de Autobahn 27 (Afsnidd Bremen–Wasra). Ofschoonst de Autobahn in en Afstand von blots een Kilometer in’n Süüdwesten von dat Dörp langsföhrt, is de nächste Opfohrt (de Opfohrt 26 Veern-Oost) över negen Kilometer wied weg in’n Noordwesten von Veernermoor an de L 171.
De nächste Bahnhoff is so bi 13 Kilometer in’n Westen de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen. Op de Bahnlien Veern–Wasra hett dat von 1910 bet 1969 Personenverkehr geven. De Bahnhoff Armsen weer in disse Tied söss Kilometer in’n Süüdwesten. De Bahnhööv Kerklinneln un Bennbössel an de Bahnlien Ülzen–Langwedel (inricht 1873) weren acht Kilometer in’n Noordwesten/Noordoosten, sünd aver 1987 dichtmaakt worrn.
Scholen ännern
Veernermoor harr fröher en egen lüttje Volksschool. Nadem de School dichtmaakt hett, gaht de Kinner vondaag op de Lintler Geest-School in Bennbössel.
Footnoten ännern
- ↑ Onlineprojekt Gefallenendenkmäler
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 101
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 155
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 164
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 175
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 180
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de