Volksbank Geest
De Volksbank Geest eG is en Volksbank mit Seet in Obbens. De Bank höört to’n Genossenschaftsverband un hett ölven Filialen in’n Landkreis Stood un Landkreis Horborg. Den Vörstand billt Hans-Hinrich Koppelmann un Wilhelm Prigge, de Vörsitter von’n Opsichtsraad is Kai Säland.
De BLZ is 200 697 82 un de BIC GENO DEF1 APE. De Bilanzsumm weer an’n 31. Dezember 2015 466 Millionen Euro. De Bank hett üm un bi 123 Mitarbeiders un 8091 Maten.
Blangen Obbens hett de Volksbank ok noch Filialen in Avens, Bargst, Dullern, Harsfeld (2×), Heendörp, Hornborg, Hullnst, Mesborg un Ooldklooster.
Historie ännern
De eerste Volksbank in dat hüdige Rebeed von de Volksbank Geest weer de Spoor- un Dorlehnskass Obbens, de 1897 grünnt worrn is.
De hüdige Volksbank Geest hett sik 1987 billt, as de Spoor- un Dorlehnskass Obbens, de Volksbank Harsfeld un de Volksbank Geestrand dör Fusion tohoopgahn sünd. De is 2002 noch wedder dör Fusion mit de Volksbank Hullnst tohoopgahn, hett dorbi aver ehren Naam behollen.
Bargst ännern
De Spoor- un Dorlehnskass Bargst is an’n 9. März 1907 grünnt worrn.[1] 1956 köfft de Kass denn ok dat eerste egene Gebüüd. Aver al 1965 warrt en Neebo an de Straat An de Kark boot.
1994 geiht de Kass in Bargst in de Volksbank Geest op.
Harsfeld ännern
De Spoor- un Dorlehnskass Harsfeld is an’n 5. April 1924 grünnt worrn. 1950 hett de Bank ehr egen Gebüüd an de Markstraat 176 kregen, wat aver toeerst blots meedt weer. 1961 hett de Bank dat Gebüüd köfft. En neet Gebüüd an de Friedrich-Huth-Straat 6 warrt denn 1974 boot un inwieht. De Naam von de Bank ännert sik 1975 in Volksbank.[2]
1987 gaht de Spoor- un Dorlehnskass Obbens, de Volksbank Harsfeld un de Volksbank Geestrand to de Volksbank Geest tohoop.
De Filiaal in de Hellweeg-Allee 2 maakt in dat Johr 2000 apen.
Hornborg ännern
De Ländliche Spoor- un Dorlehnskass Hornborg is an’n 3. Juni 1921 grünnt worrn. Dat eerste egene Gebüüd hett de Kass 1954 an de Lange Straat kregen.[3] An’n 22. Mai 1969 warrt dat Woord Ländliche ut’n Naam streken un de Bank heet blots noch Spoor- un Dorlehnskass Hornborg.
De Filiaal in Dullern an de Straat Op’n Reller maakt an’n 20. Oktober 1969 apen. 2000 tütt de Filiaal in en Neebo in de Straat An’n Buschdiek.
1972 geiht de Volksbank Hornborg mit de Volksbank Neeklooster dör Fusion tohoop. Düsse ne’e Bank kriggt 1985 den Naam Volksbank Geestrand.
En Filiaal in Bliersdörp maakt in’n April 1982 apen.
Hullnst ännern
De Spoor- un Dorlehnskass Hullnst is an’n 25. Februar 1907 grünnt worrn. Dat eerste egene Gebüüd kriggt de Bank 1953 an de Hauptstraat Eck Töster Straat. Op düt Grundstück warrt 1966 denn en neet Gebüüd boot. De Filiaal in Avens in de Töster Straat maakt 1969 apen. Düsse Filiaal kriggt 1992 en neet Gebüüd op de annere Stratensied. 1975 hett de Bank ehren Naam op Volksbank ännert.
1987 warrt denn in Hullnst ok wedder en neet Gebüüd boot, nu an de Bahnhoffstraat.[4]
1988 gaht de Volksbank Hullnst un de Volksbank Mesborg tohoop un 2002 geiht denn de Volksbank Hullnst in de Volksbank Geest op.
Mesborg ännern
De Spoor- un Dorlehnskass Mesborg is an’n 24. Mai 1925 grünnt worrn un boot 1960 ehr eerst egen Gebüüd.[5] 1952 hett de Kass ok den Hannel mit Woren för de Bueree opnahmen. Düt Geschäftsfeld gifft de Kass aver 1968 an de Spoor- un Dorlehnskass Elsdörp af. 1976 hett de Spoor- un Dorlehnskass Mesborg den ne’en Naam Volksbank Mesborg kregen.
1988 gaht de Volksbank Hullnst un de Volksbank Mesborg dör Fusion tohoop.
1997 warrt in Mesborg en neet Gebüüd an de Straat Op’n Damm boot.
Neeklooster ännern
De Spoor- un Dorlehnskass Neeklooster eGmuH in Neeklooster is an’n 26. März 1925 grünnt worrn. De Geschäftssteed weer toeerst in Privathüüs ünnerbrocht. Eerst 1967 hett de Volksbank an de Cuxhobener Straat (Ecke Waldstraat) ehr eerst egen Gebüüd kregen. 1972 hett de Volksbank en Filiaal in Heendörp an de Straat An’n Sportplatz apenmaakt. 1972 geiht de Volksbank Neeklooster mit de Volksbank Hornborg dör Fusion tohoop.[6]
1986 hett de Bank, de siet 1985 Volksbank Geestrand heet, de Filialen in Neeklooster un Heendörp dichtmaakt un dorför warrt en neet Gebüüd an de Cuxhobener Straat 158 in Heendörp boot. 2007 is de Bank noch wedder ümtagen un hett ehr Gebüüd nu in de Cuxhobener Straat 181b.
1987 gaht de Spoor- un Dorlehnskass Obbens, de Volksbank Harsfeld un de Volksbank Geestrand to de Volksbank Geest tohoop.
Obbens ännern
De Spoor- un Dorlehnskass Obbens is an’n 25. September 1897 grünnt worrn. Dat eerste egen Gebüüd hett de Bank 1928 kregen. Op dat Grundstück steiht de Bank ok vondaag noch. 1970 grünnt de Spoor- un Dorlehnskass Obbens en Filiaal in Ooldklooster an’e Eck von Stieglitzweg un Drosselstieg. 1978 kriggt disse Filiaal en Neebo an’n Delmer Bagen.[7]
1987 gaht de Kass in Obbens, de Volksbank Harsfeld un de Volksbank Geestrand to de Volksbank Geest tohoop.
Footnoten ännern
Weblenken ännern
- Websteed von de Volksbank (hoochdüütsch)