Waragi
Waragi (IPA: waragi, ok: waradʒi) is en Drunk ut Uganda, de in de Oort vun Gin maakt warrt. In Uganda sülvst, dat Land mit den weltwiet hööchsten Alkohol-Verbruuk vun 19,47 Liter op Kopp un Johr[1], warrt de hoochprozentige Waragi veel un faken drunken.
De Naam is ut de Beteken „war gin“ (op platt: Kriegsgin) afleidt. Präägt worrn is disse Begreep för den in’t Land brennten Snaps in de 1950er un 1960er Johren vun de Briten, de in Uganda leevt hebbt. Uganda weer bit to de Unafhangigkeit 1962 en britisch Protektorat.
Op Luganda hett de Drunk enguli heten. 1965 hett dat Enguli-Gesett („The Enguli Act“) fastleggtm dat disse alkohoolsche Drunk blots noch ünner staatliche Lizenz brennt warrn dröff. Scheert hett sik dorüm aver nümms.
Ut disse Tiet stammt noch de vundaag an’n meisten drunken Waragi-Marke Uganda Waragi, de dormols vun en Staatsbedrief herstellt un affüllt weer. Vundaag warrt de Marke vun East African Breweries Limited produzeert. Anboden warrt Uganda Waragi normalerwies in Buddels oder in lütte Büdels affüllt, de dat in tomeist jeden Kiosk to köpen gifft. Disse Marke, de ok as UG oder Spirit of Uganda (op platt: De Geist vun Uganda) betekent warrt, warrt ut Hirse maakt.
Annere geern drunken Waragi-Marken, de to’n Deel vun lütte Brennereen herstellt warrt, sünd Lira Lira, de ut Maniokmehr un Rohrsucker maakt warrt, un Kasese, de na de Stadt Kasese nöömt is un ut de grönen Kaakbananen (Matoke) brennt warrt.