Wellerismus

En Wellerismus oder apologeetsch Seggwoort is en Snack, de ut dree Delen besteiht: en Seggwoort un denn achteran en Nevensatz, ’keen dat seggt un de Situatschoon, in de dat seggt warrt. En Bispeel is: „Allens mit Maat, segg de Snieder, do slöög he sien Wief mit de Eel doot.“, „All Bott helpt, sä de Mügg un mieg in de See.“ oder „Veel Geschrigg un wenig Wull, sä de Düwel, do klipp he en Swien.“. Disse Snacks sünd vör allen in dat Plattdüütsche un dat Nedderlandsche begäng. Se nehmt en bekannt Seggwoort faken för Woort un geevt dat en komischen Dreih.

De Naam Wellerismus kummt vun de Figur Sam Weller in Dickens sien Book The Pickwick Papers. De Figur geev jümmer sone spoßigen Wellerismen vun sik un dör em is Dickens man eerst so richtig beröhmt worrn.