Whitbread (Ünnernehmen)
Whitbread PLC is en britisch Ünnernehmen, to dat mehrere bekannte Hotels, Restaurants, as ok Gesundheits- un Fitnessclubs höört. Ünner annern höörn unn höört dorto de Keden Pizza Hut, Maredo, Premier Inn un Marriott International[1]. De Sitt vun de Public Limited Company is in’t engelsche Dunstable in de Graffschop Bedfordshire. Dat Ünnernehmen is in’n britischen FTSE 250 Index börsennoteert (Kennteken WTB).
Historie
ännernDat Ünnernehmen is vun Samuel Whitbread (* 20. August 1720; † 11. Juni 1796) grünnt worrn, de 1742 en Partnerschop mit Thomas Shewell anfungen hett un Geld in twee lütte Broereen vun de Shewells steken hett. Whitbread hett den Bedrief jümmer mehr utboet. 1765 hett he Shewell sien Andeel utbetahlt. In’t late 18. Johrhunnert is Whitbread to de gröttsten Broeree vun Grootbritannien worrn[2].
In’t Johr 1889 is de Familienbedrief as Whitbread and Company PLC för Investers vun buten apen maakt worrn. In de Johren vun 1955 bit 1971 hett dat Ünnernehmen tohopen 27 regionale Broereen övernahmen. 1968 kreeg de Firma de Lizenz för dat Broen vun Heineken Lager. 1974 is en Restaurant (Beefeater, op platt so veel as Rindfleescheter) apen maakt worrn. In de Johrteihnten dorop hett de Bedrief op dat Rebeet vun Restaurants un Hotels jümmer wieter tonahmen. 1982 kemen de Pizza-Hut-Restaurants dorto, 1987 Premier Travel Inn un 1995 de Marriott-Hotels un de Café-Keed Costa Coffee[1].
Gliektietig hett sik dat Ünnernehmen ut dat Gewarf mit Alkoholika na un na torüchtogen. 1989 is de Sparte Wien un Spirituosen an Allied-Lyons verköfft worrn, 2000 weer de Whitbread Beer Company an Interbrew S.A. un 2001 de Sparte Kneipen an Morgan Grenfell Private Equity.[1] verköfft. Dormit hett dat Ünnernehmen vundaag gor keen Broereen mehr in Besitt.
Whitbread as Sponser
ännern1971 is Whitbread Sponser vun de ne’en Whitbread Book Awards worrn. Dat is en Literaturpries för Schrievers, de tomindst dree Johren in Grootbritannien oder Irland leevt hebbt. Toeerst weern jeed Johr dree, later denn fief Böker mit den Pries uttekent, wobi een dorvun to’t Whitbread book of the year utwählt weer. Whitbread hett sik vun den Pries 2005 torüchtogen. Siet de Tiet warrtde Pries vun de Keed Costa Coffee, en Dochter-Ünnernehmen vun Whitbread, ünner den ne’en Naam Costa Book Award sponsert.[3]
In 1972 is dat Ünnernehmen Sponser vun de ne’e grünnten Seilregatta Whitbread Round the World Race (faken ok blots kort Whitbread) worrn. Dat weer de eerste Regatta, bi dat de Mitmakers eenmol üm de hele Welt reisen doot. Bit vundaag gellt se as een vun de hardsten un ok bekanntsten Regattas slechthen. Whitbread is 1998 as Sponser aflöst worrn. Dorna hett Volvo dat övernahmen, worophen de Regatta den ne’en Naam Volvo Ocean Race kregen hett.[4]
Borns
ännern- ↑ a b c International Directory of Company Histories, Bd. 52. St. James Press, 2003. Weddergeven in: Whitbread PLC op fundinguniverse.com (engl.; afropen an’n 8. Juni 2007)
- ↑ Samuel Whitbread op www.spartacus.schoolnet.co.uk (engelsch; afropen an’n 8. Juni 2007)
- ↑ The Whitbread Book Awards op facstaff.unca.edu (engelsch; afropen anvn 8. Juni 2007)
- ↑ About the Race. Whitbread 1973-74, op de Websteden vun www.volvooceanrace.org (engelsch; afropen an’n 8. Juni 2007); About the Race. Volvo Ocean Race 2001-2002, op de Websteden vun www.volvooceanrace.org (engelsch; afropen an’n 8. Juni 2007)