Wittekind
Wittekind oder Widukind weer de Hartog von de Sassen in’n Wedderstand gegen Korl den Groten 777 bet 785. He hett de Sassen in de Kriege gegen de Franken anföhrt un gegen de Invasion von de Franken un jemehr christlichen Glöven anstreden. Wittekind dee ut Westfalen stammen.
In dat Johr 772 hebbt de Franken de Sassen överfullen un de Irmensul tweislaan. In de Johren bet 776 geev dat allerhand Gefechten twischen Sassen un Franken. 776 denn hett en Deel von de sasseschen Edeln en Verdrag ünnerschreven, de Korl sien Herrschop goodkennen dee. Sassen schull Mark to dat Frankenriek wesen. För 777 kummt Wittekind denn dat eerste Maal in de fränkschen Rieksannalen vör. 777 schullen de sasseschen Edeln an Korl sien Rieksdag in Patterbuorn deelnehmen. Wittekind güng aver na Däänmark to König Sigifrid un bleev von’n Rieksdag weg. De Wedderstand gegen de Franken güng ok so wieder bet 782. Do wull Korl Sassen ganz insacken un to en Deel von sien Riek maken. Wittekind keem nu ut Däänmark trüch un dee de Sassen anföhren gegen de Franken un gegen de Edeln, de för Korl weren. Wittekind dee en wichtige Slacht winnen, bi de ok twee wichtige Beamte von Korl sien Hoff bi doodhaut worrn sünd. Aver Korl dee nu ut Wraak in Veern 4500 Sassen de Köpp afslaan, dat weer dat Bloodgericht vun Veern. Bi de Slacht an de Grotenborg kunn Wittekind Korl trüchslaan, aver bi de Slacht an de Hase hett Korl wunnen. 784 kemen ok de Fresen Wittekind un de Sassen to Hülp. Bet 785 duur de Wedderstand noch. Aver en Enn von’n Krieg weer noch nich in Sicht. Do hett Wittekind sik denn to Wiehnachten 785 döpen laten, üm mit Korl Freden to maken. De Dööp weer in Attigny un Korl weer de Dööpvadder.
Na de Dööp keem Wittekind in de fränkschen Annalen nich wedder vör. In de Vita Liudgeri warrt nochmal von em snackt un in de Kaiserchronik steit in, dat Wittekind later von Gerold von Swaben, Korl sien Swager, doodslaan worrn is. Gerold sülvst is 799 doodbleven.
Meginhard schrifft in sien De miraculis sancti Alexandri, dat Wittekind en Söhn harr, de Wikbert heten hett. De nu harr wedder en Söhn Waltbert, un Waltbert sien Söhn weer Wikbert, de denn Bischop von Veern weer. Bi Widukind von Corvey steit schreven, dat Mathilde, de twete Fro von König Hinrik I., von ehr Vadder sien Sied von Wittekind afstammt.
Dat gifft de Legenn, dat Wittekind in Enger in de Stiftkark begraven is. Dor gifft dat ok en Graffdeek, de aver eerst ut de Tied von 1100 stammt.
Later
ännern
In de kathoolsche Kark gellt Wittekind as en Seligen. Mit de Religion verbunnen is ok de Saag von Wittekind sien Peerd. Wittekind schall en swarten Hingst reden hebben. Nadem he sik aver harr döpen laten, hett he en witt Peerd reden. Dat Peerd is in latere Tieden denn as Sassenpeerd dat Symbol von de Sassen worrn un kummt ok nu noch vele in Wapen vör. Ünner annern in de Wapen von Westfalen un dat Bundsland Neddersassen.
In Nienborg gifft dat en Statue von Wittekind un in Hiarwede dat Wittekinddenkmal. Dat is 1959 na de Idee von Heinrich Wefings von’n Baukemer Bildhauer Kruse trechmaakt worrn. Dat ole Denkmal von 1899 weer 1942 in’n Krieg insmulten worrn.
De Kreis Hiarwede heet faken ok Wittekindskreis.
Ok in dat Neddersassen- un Westfalenleed kummt Wittekind vör.
An’n Wittekindsbarg mit de westfäälsche Wittekindsborg löppt de 95 km lange Wittekindsweg bet na de Wittekindsborg in Neddersassen in’t Ossenbrügger Land.
In Vreen heet dat Stadion na Wittekind Widukindstadion.
De Saddelmeier in’t Ravensberger Land schöölt Nafohren von de Getreuen von Wittekind wesen.
Weblenken
ännern
- Wittekind-Museum in Enger (hoochdüütsch)