Wymeer

Wymeer liggt in‘n butersten Süüdwesten van dat oostfreesch Rheiderland tüschen de A 31 un de düütsch-nedderlannsch Grenz. In den Ort leeven up en Rebeet van etwa 23 Quadratkilometer goot 1300 Inwahner. Wymeer is en Oortschap van de Gemeend Bunn.

Geschichte

Wymeer wur in dat Middelöller grünnd. Dat eerste Mal wurr se 1319 in en Schriftstück as "Wymaria" nöömt. Dat dokumenteer en to dissen Tietpunkt all langer bestahn Johanniter-Daallaaten. De Grünnen stunn wohrschienlich in’n Tosommenhang mit de Johanniterkommende Dünebroek, de nah de Reformatschoon uplöst wurr. Dat gifft dor hüüd noch en Gemarkung mit den Naam Kloster Dünebroek, man steiht dor nu en Buurnhuus.

In dat Laatmiddelöller muss de Siedlung mehrfach dör Dullertinbröök verleggt wurrn. As en Oort dicht bi van de oostfreesch Grenz to Mönster un den Nedderlannen harr Wymeer in tallriek Kriegen un Fehden düchtig to lieden. In dat 19. Johrhunnert hemm völ Wymeerster hör Heimat verlaaten un sünd in Richt nee Welt utwannert.

Nah den Tweeten Weltkrieg hemm de Nedderlannen Rebeetsanspröök an Düütschland, de aber man blots ganz minn van de Allieerten berücksichtigt wurrn. Man kreegen de Nedderlannen in Wymeer en etwa 100 Meter breeden Striepen an de Grenz tospraaken, den de Wymeerster Buurn blots mit en besünnern Pass betreeden drüffen. Dat Rebeet kehr eerst 1963 torüch.

1973 is Wymeer de Samtgemeend Bunn bitreeden, ofschons de Ooort eegentlich traditschonell ehrder Verbinnen nah Weener pleegen dee. Sluutend wurr de Samtgemeend an’n 1. November 2001 in en Eenheitsgemeend umwannelt. Sietdem is Wymeer en Oortschap van Bunn.

Siet 1983 is dat 52 Hektar umfaatend Hoochmoor Wymeer as Naturschuulrebeet utwiest.

Weblinks

• www.wymeer.de