Wikipedia
Wikipedia is en free Nakieksel, wo elkeen an mitwarken kann. Elkeen kann glieks en Artikel schrieven oder ok en Artikel, den dat al gifft, verbetern. Wikipedia kümmt vun dat hawaiische Woord wiki, wat op plattdüütsch gau heet. Un pedia kümmt vun encyclopedia, wat Nakieksel op Ingelsch is. De Inholt steiht ünner de Lizenz GNU-FDL.
Historie
ännernWikipedia is de Opfolger vun Nupedia. Jimmy Wales harr Nupedia 2000 grünnt un wull dormit en Nakieksel opboon, dat elkeen kostenlos bruken kunn. Freewillige schullen de Artikels schrieven un dorför wull he Experten ranhalen, de Artikels ut jemehr Fackrebeet schrieven schullen. Aver för dat Projekt weer dat en groot Problem ok noog Lüüd rantokriegen. Nupedia keem eenfach nich in’e Pötte. Dorvun hebbt an’n 15. Januar 2001 Jimmy Wales un Larry Sanger Wikipedia opmaakt. Bi Wikipedia schullen ok Lüüd schrieven, de kene Facklüüd sünd. Wat denn bi Wikipedia schreven warrt, schullen de Facklüüd op Nupedia dörkieken un wenn allens richtig weer, denn schull dat op Nupedia rinstellt warrn. Aver Wikipedia harr nu so’n Spood, dat Nupedia dor gor nicht achterher kamen kunn. Wikipedia alleen dee veel beter lopen. Nupedia is denn en Stoot later opgeven worrn. Vun Wikipedia harr dat toeerst blot en engelsche Utgaav geven. Na’n Tiet eerst kemen denn en hoochdüütsche un en katalaansche Utgaav dorto. Un mit de Tiet jümmer mehr Spraken. De plattdüütsche Utgaav gifft dat siet April 2003.