Wikipedia:Anmellen
Dat Anmellen op Wikipedia is keen Plicht. Een kann ok mitschrieven, wenn he nich anmellt is. Denn steiht bi den Text jümmer blot de IP-Adress bi, mit de du jüst in’t Internett ünnerwegens büst (bi welk Lüüd is disse Nummer jümmer en annere, wenn se den Reekner wedder nee anmaakt, bi annere Lüüd blifft de Nummer jümmer desülve).
Dat Anmellen hett aver sien Vördelen. Bi allens, wat du schreven hest, steiht denn dien sülvst utsöchten Brukernaam bi. Du hest denn ok dien egen Brukersiet un en egen Siet, op de di annere Brukers Narichten dorlaten köönt. Un denn kannst du ok de Software för di instellen. Wenn di de Biller to’n Bispeel to lütt sünd, kannst du jem grötter maken, oder du kannst di en Oppasslist maken, op de denn opsteiht, wenn Artikels ännert warrt, för de du di intresseerst.
Dat Anmellen geiht ganz licht. Wenn du noch nich anmellt büst, denn steiht baven rechts op de Siet ‚Anmellen‘. Wenn du op disse Siet ropklickst, denn kummt en Formular. Du musst denn toeerst nochmal op Brukerkonto inrichten klicken, denn en Brukerkonto hest du ja noch nich. Bi dat ne’e Formular, dat nu kummt, kummt nu teerst mal en groten Kassen mit en Bild. In dit Bild staht en lütten Text in. Villicht kennst du dat al vun annere Sieden. Dat is en Captcha. Du musst dissen lütten Text ut dat Bild aflesen un in dat Textfeld rinschrieven. Dat mutt leider wesen, denn ans kann dat angahn, dat dat gorkeen echten Minschen is, de sik anmellen will. Welk Lüüd schrievt lütte Programmen, mit de de Computer so’n Formular ganz alleen utfüllen kann. Un wenn de Reekner sik denn anmellt hett, denn maakt se Dummtüüch op de Siet. Aver de Bookstaven in en Bild kann de Computer nich alleen lesen, dor is he to dumm to. Dorvun mutt dat wesen. Wenn du dat also daan hest, denn kannst du di toeerst mal en Brukernaam utsöken. As tweet kannst du natürlich ok dat Passwoord för dien Brukerkonto fastleggen. Un to’n Sluss noch de E-Mail-Adress angeven. Dat musst du nich, wenn du dat nich wullt, aver dat hett den Vördeel, dat annere Brukers di schrieven köönt (dat lett sik nochmal extra instellen) un dat hett vör allen ok den Vördeel, dat wi di en neet Passwoord toschicken köönt, wenn du dat ole mal vergeten hest. Nu kannst du dien Brukerkonto opstellen. Wi freit uns, wenn wi di as ne’en Bruker begröten dröfft!