Mit Listen schall’n vörsichtig wesen, wenn’n de as Artikel anleggen will. Listen schöölt blots denn bruukt warrn, wenn de Saken, de oplist warrt, vun ene faste un begrenzte, kloor defineerte Tall sünd, de todem so groot is, dat se nich in den Utgangsartikel passt, un in en logische Reeg bracht warrn köönt. Dat heet, kene Listen schöölt maakt warrn, wenn de Tall temlich groot is, nich kloor is, wat dor rinschreven warrn schall.

Bispeel: Ene List vun de Bischöp vun Brescia kann Sinn maken, denn de Tall vun Bischöp is bekannt, is so groot, dat se in den Artikel Bisdom Brescia villicht to veel Platz innimmt, dat Kriterium för de Opnahm vun Artikels is kloor defineert un dat gifft kene Fäll, wo Twiefels anbracht sünd un todem köönt de Artikels to de Bischöp in en logische Reeg bracht warrn, na ehr Amtstieden.

Gegenbispeel: Ene List vun Scheep maakt kenen Sinn, dat gifft un geev dusende un Milljonen Scheep op de Welt, de’n nich all in de List opnehmen kann. Dat gifft ok keen logisch Kriterium, woans de Scheep sorteert warrn schöölt oder wat överhaupt en Schipp is. Föhren to’n Bispeel de Wikingers op Wikingerbööd oder op Wikingerscheep?

De vörhannenen Listen staht in de Kategorie:List.