Hauptmenü öffnen

Wilfried „Willi the kid“ Pallhuber (* 4. August 1967 in Niederrasen, Südtirol) is en ehmalger italieensch Biathlet.

In de Saison 1990/91 reck Pallhuber in den Biathlon-Weltcup mit de italieensch Staffel sowohl bei den Weltcup-Uptakt in Albertville as ok bi den Afsluss mit de italieensch Mannschap jewiels den darten Platz. Bi de darte Statschoon in Antholz leeg de Staffel vun Italien sogor up den 2. Platz. He sülvst reck in de Weltcup-Gesamtwertung an' Enn' Platz 8.

In de Folgesaison wunn he den Sprint vun Nowosibirsk vör den Öösterrieker Ludwig Gredler un Mikael Löfgren ut Sweden und keem in de Gesamtwertung up Platz 9. 1992 nehm he eerstmals an Olympisch Winterspelen deel. Över de 20 km-Strecke keem he dorbi up Platz 40. In de Staffel wurr he nich beropen.

Ok in de Saison 1992/93 kunn he weer en Weltcuprennen up sien Naam schrieven. Tonächst wunn he mit de Staffel bi de tweete Statschoon in Ridnaun un wunn bi de 4. Statschoon in Lillehammer dat Eenzelrennen. Dat führ ok dorto, dat he in den Eenzelweltcup an dat Enn' den darten Platz belegg. In den Gesamtweltcup keem he aber nich ünner de best Teihn. Bi de Biathlon-Weltmeesterschapen 1993 keem he in dat Eenzelrennen aber blots up den 48. Platz, wunn aber mit de Staffel gemeensam mit Johann Passler, Pieralberto Carrara un Andreas Zingerle de Goldmedaille, wat denn sien eerst Weltmeestertitel weer.

De Weltcupsaison 1993/94 leep ebenfalls weer bannig spoodriek fvör Pallhuber. So wunn he in dat kanaadsch Hinton dat Eenzelrennen un in Canmore de Staffel. An dat Enn' vun de Saison harr he in den Sprint-, Eenzel- un Gesamtweltcup jewiels den 7. Platz reckt. Bi de Olympisch Winterspelen in Lillehammer keem he in dat Eenzel blots up Platz 24. In de Staffel keem he nich to'n Insatz.

To de Saison 1994/95 leep dat nochmal beter. Up de darte Statschoon in Antholz wunn he dat Eenzelrennen vör Patrice Bailly-Salins un Eduard Alexandrowitsch Rjabow, reck in Ruhpolding mit de Staffel den tweeten Platz un keem in Lahti in dat Eenzelrennen nochmal up den darten Platz. In den Gesamtweltcup keem he up den darten Platz un in den Eenzelweltcup belegg he an' Enn Platz 2, blots 2 Punkte achter den Sieger Patrick Favre.

In de Saison 1995/96 reck he in de Eenzelrennen nich eenmal dat Podest un ok bi de Biathlon-Weltmeesterschapen 1996 reck he in dat Eenzelrennen blots Rang 41, in' Sprint reck dat aber noch to Platz 7. Bi de eerst Sömmerbiathlon-Weltmeesterschapen 1996 in Hochfilzen wunn he den Titel in dat Sprintrennen.

Bedüüdend spoodrieker verleep de Folgesaison. Glieks bi de tweete Statschoon wunn he dat Eenzelrennen in Östersund un reck later nochmal mit de Staffel den 2. Platz. In den Gesamtweltcup keem he up Platz 15. Bi de Biathlon-Weltmeesterschapen 1997 in Osrblie wurr he Weltmeester in' Sprint vör sien Landsmann René Cattarinussi un Oleg Ryschenkow ut Wittrussland, keem in Verfolgung un Eenzel nich up dat Podest, reck aber mit de Staffel noch de Bronzemedaille.

In de Saison 1997/98 reck he blots mit de italieensch Staffel mal Platz 3 un keem in den Gesamtweltcup ok blots up Rang 23. Een Saison later reck he Platz 24 in den Gesamtweltcup un bi de Biathlon-Weltmeesterschapen reck he mit de italieensch Staffel ok blots Platz 8.

In de Saison 1999/2000 keem he in den Gesamtweltcup blots up Rang 54, verbeter sück aber 2000/2001 weer up Platz 27, um in de Saison 2001/02 weer up Platz 67 torüchtofallen un bleev ok ahn Spood bi sien veerte Olympiadeelnahm.

De Saison 2002/03 leep weer wat beter för hüm. Mit de italieensch Staffel keem he eenmal up dat Podest un in de Gesamtwertung keem he up Rang 31. Bi de Biathlon-Weltmeesterschapen 2003 weer Rang 19 in de Verfolgung nah en Platz 32 in den Sprint sien best Platzeeren. In de Saison 2003/04 reck he noch Mal Platz 43 in den Weltcup. Bi de Biathlon-Weltmeesterschapen 2004 keem he blots eenmal ünner de best 25. Platz 43 in den Gesamtweltcup reck he ok in de Folgesaison, allerdings reck he dörgahns good Ergevnisse bi de Biathlon-Weltmeesterschapen 2005 in Hochfilzen. Platz 25 in' Sprint kunn he in de Verfolgung up Platz 13 verbetern. In den Massenstart keem he up Platz 23 rin un in dat Eenzelrennen schaff he sogor noch mal den 10. Platz.

Sien vörletzt Weltcup-Saison broch hem denn noch mal Platz 47 in. Ok bi sien fievte un letzt olympisch Spelen keem he noch mal in dat Eenzel up den 9. Platz un mit de Staffel up Rang 8. Ok in sien letzt Weltcup-Saison keem he noch mal up Rang 47 in den Gesamtweltcup. Dornah hett he sien Loopbahn afslooten. Bi de Biathlon-Weltmeesterschapen 2007 in Antholz weer sien best Ergevnis Platz 24 in' Sprint.

WeblenkenÄnnern