Wilhelm Barkhausen

Friedrich August Wilhelm Barkhausen (* 1. August 1875 in Berlin; † Juni 1933) weer en düütschen Verwaltungsbeamten.

Barkhausen is 1875 in Berlin boren. He hett 1894 bet 1896 en Lehrtied in de Bueree op en Riddergood in dat Hartogdom Mekelborg-Swerin maakt un 1896 anfungen, an de Universitäten Berlin, Heidelberg un München Juristeree to studeren. Mit dat Studium weer he 1901 trech. Na dat Studium weer he Referendar bi dat Landgericht II in Berlin un von 1903 af an bi de Regerung in Marienwerder. 1906 is he Regerungsassesser bi de Regerung in Posen worrn. 1913 hett he eerst as Verwalter dat Landraadsamt von’n Kreis Briesen övernahmen un is an’n 26. September 1913 as richtigen Landraad in Briesen insett worrn. Nadem de Kreis Briesen na’n Eersten Weltkrieg dör den Fredensverdrag von Versailles an Polen fallen schull, is Barkhausen an’n 14. August 1919 an de Regerung in Auerk versett worrn un weer denn von 1920 bet to sien Dood 1933 Landraad in’n Landkreis Auerk.

Von 1928 bet 1931 weer he ok Präsident von de Landssynood in de Evangeelsch-luthersche Landskark Hannover.