Wilhelm Theodor Roscher
Wilhelm Theodor Roscher (* 6. Juni 1818 in Drey; † 22. November 1892 in Göttingen) weer en düütschen Jurist un Parlamentarier.
Roscher is 1818 as Söhn von Anna Margarethe Katharine, borene Manecke (7. Juli 1790–6. April 1861), un den Tolldirekter Theodor Gottfried Roscher (14. Februar 1783–8. Mai 1858) in Drey boren.[1] De Richter un Parlamentarier Heinrich Roscher weer sien Broder. He hett Juristeree an de Universität Göttingen studeert un is dor 1838 Maat von dat Corps Bremensia worrn.[2] Na dat Studium is he as Anhänger von de Göttinger Söven toeerst längere Tied nich to dat Examen as Auditer tolaten worrn.[3]
Roscher weer in de Tied üm 1843 bet 1845 rüm Auditer bi dat Amt Wischhoben un later Amtsassesser bi dat Amt Reten. 1848/1849 weer he as Amtsassesser Hülpsarbeider bi de Landdrostie Stood un denn Maat von de Justizkanzlie Celle. Na de Tied in Celle weer he Amtsassesser bi dat Amt Bondiek. 1852 is he Referent in’t hannöversche Justizministerium worrn un weer Obergerichtsassesser. He is 1858 Obergerichtsraad worrn un 1860 Oberappellatschoonsgerichtsraad an dat Oberlandsgericht Celle. 1874 keem he as Direkter an dat Obergericht Celle un 1879 as Landgerichtspräsident an dat Landgericht Göttingen.
Roscher weer von 1864 bet 1865 Maat von de Twete Kamer von de Stännversammlung von dat Königriek Hannover. Bi de Wahl 1867 to dat Prüüßsche Aforntenhuus weer he Kannedaat för den Wahlkreis Hannover 35 (Veern) un hett sik mit 80,4 % von de Stimmen gegen Wilhelm von Hammerstein dörsett. He is bet 1869 Afornten bleven un is denn rut. För em is in en Nawahl eerst Georg Gustav Lueder (hett de Wahl aflehnt) un denn Franz Joseph Heinichen nawählt worrn. Bi de Wahl 1870 to dat Aforntenhuus hett he sik wedder opstellen laten. Dütmaal in’n Wahlkreis Hannover 5 (Lingen). Bet 1873 is Roscher Afornten bleven. In dat Aforntenhuus hett he to de Frakschoon von de Natschonalliberale Partei höört. In de Johren 1872 un 1873 weer he ok Maat von de Justizkommission.
Roscher hett Henriette Viktoria (Victorine) Elisabeth Schaumann (26. März 1826–31. Januar 1880) freet.[1] De beiden harrn den Söhn Friedrich Wilhelm Theodor Roscher (7. November 1853–23. Februar 1918).[1]
Ehren ännern
- 1887: Gehemen Oberjustizraad
- Ehrenmaat von dat Corps Bremensia Göttingen
- Dr. jur. h. c.
Footnoten ännern
- ↑ a b c Bernhard Peter: Historische heraldische Exlibris (57)
- ↑ Kösener Korpslisten 1910, 63, 458
- ↑ Wilhelm Rothert: Hannoversche Männer und Frauen seit 1866 (Allgemeine Hannoversche Biografie, Band 1), Sponholtz, Hannover 1912, Sied 363