Womack & Womack

Womack & Womack weer en US-amerikaansch Popmusik-Duo bestahnd ut dat Ehepaar Linda (* 1953) un Cecil Womack (* 25. September 1947 in Cleveland, Ohio; † 1. Februar 2013 in Süüdafrika).

Cecil Womack, de jüngere Bröer vun Bobby Womack, hett sien latere Ehefru Linda all in dat Johr 1961 kennenlernt, as se man jüst acht Johr olt weer. Se weer de Dochter vun Sam Cooke, de dormals jüst Cecil un Bobby Womack as ok hör Bröers Curtis, Harry un Cedric as The Valentinos för sien eegen Label ünner Verdrag nommen harr.

Sowohl hör Leevstengeschichte as ok hör Tosommenarbeit fung Anfang vun de 1970er Johren an, as Linda un Cecil Womack vun dat berühmt Philly-Soul-Label Philadelphia International Records as Songschrieverteam instellt wurrn. Se hebbt ünner annern Songs för The O’Jays, Patti LaBelle un Teddy Pendergrass schreeven. Nah hör Heirat 1975 fungen se an an hör eegen Konzept to arbeiten. Dat eerste Ergevnis weer de LP Love Wars (1984), de vör allen in England bannig good ankeem. Womack & Womack hebbt traditschonelle Stile vun d swaart Musikkultur as Gospel un Rhythm ’n Blues mit witt Kommerzpop mischt. As nächst keemen de Alben M. U. S. C. Man (1985) un Starbright (1986) herut, mit de se ehr Stil immer wieder verfienern deen. Kritiker hebbt aber de technisch Överproduktschoon bemängelt.

1988 kunnen Womack & Womack mit de as Meesterwark fiert LP Conscience (D # 5, GB # 4) as ok den Hit-Singles Teardrops (D # 2, GB # 3) un Celebrate The World (D # 22, GB # 19) ehr gröttsten Spood fiern. In hör Heimat USA funnen hör Platten aber wenig Anklang. 1991 keem dat Album Family Spirit herut, dat den Spood vun Conscience nich wedderhalen kunn un vun de Kritiker as „ideenloser Hochglanzpop“ betekent wurr. Toletzt keem 1993 dat Album Transformation To The House Of Zekkariyas herut. Dat Duo leet sück later in Afrika daal.

Diskographie

• Love Wars (1984)
• M. U. S. C. Man (1985)
• Starbright (1986)
• Conscience (1988)
• Family Spirit (1991)
• Transformation To The House Of Zekkariyas (1993)

Weblenken

• DNB-Katalog